తమిళ స్టార్ హీరో సూర్య, వైవిధ్యభరిత చిత్రాల దర్శకుడు టీజే జ్ఞానవేల్ కలయికలో మరో క్రేజీ ప్రాజెక్ట్ పట్టాలెక్కింది. గతంలో వీరిద్దరి కాంబినేషన్లో వచ్చిన ‘జై భీమ్’ చిత్రం ప్రపంచవ్యాప్తంగా విమర్శకుల ప్రశంసలు అందుకోవడమే కాకుండా భారీ విజయాన్ని నమోదు చేసింది. ఇప్పుడు మరోసారి ఈ సక్సెస్ ఫుల్ కాంబో రిపీట్ అవుతుండటంతో సినీ వర్గాల్లో మరియు ప్రేక్షకుల్లో భారీ అంచనాలు నెలకొన్నాయి. ఈ సరికొత్త చిత్రాన్ని పాన్-ఇండియా బ్లాక్బస్టర్లు ‘కేజీఎఫ్’, ‘కాంతార’, ‘సలార్’ చిత్రాలను అందించిన ప్రముఖ నిర్మాణ సంస్థ ‘హోంబలే ఫిల్మ్స్’ నిర్మిస్తోంది. సూర్య మరియు హోంబలే ఫిల్మ్స్ కలయికలో వస్తున్న మొదటి చిత్రం ఇదే కావడం విశేషం.
ఈ భారీ చిత్ర ముహూర్తపు వేడుక సోమవారం (జూన్ 29) చెన్నైలో ఘనంగా నిర్వహించబడింది. కమర్షియల్ హంగులతో కూడిన పవర్ఫుల్ మరియు గ్రిట్టి డ్రామాగా తెరకెక్కనున్న ఈ చిత్రంలో సూర్య సరసన హీరోయిన్గా కయాదు లోహర్ నటిస్తోంది. ఈ సినిమాకు సాయి అభ్యంకర్ సంగీతాన్ని సమకూరుస్తుండగా, ఎస్.ఆర్. కతిర్ సినిమాటోగ్రాఫర్గా, ఫిలోమిన్ రాజ్ ఎడిటర్గా బాధ్యతలు నిర్వహించనున్నారు. సూపర్ స్టార్ రజనీకాంత్తో ‘వెట్టైయాన్’ వంటి భారీ చిత్రాన్ని రూపొందించిన దర్శకుడు జ్ఞానవేల్, ఆ వెంటనే సూర్యతో ఈ క్రేజీ ప్రాజెక్టును పట్టాలెక్కించడం విశేషం. ఇటీవలే ‘కరుప్పు’ చిత్రంతో ఘన విజయాన్ని అందుకున్న సూర్య, ఈ కొత్త సినిమాతో మరోసారి ప్రేక్షకులను అలరించడానికి సిద్ధమవుతున్నారు.
ఈ ప్రాజెక్ట్ ప్రారంభమైన సందర్భంగా హోంబలే ఫిల్మ్స్ అధినేత విజయ్ కిరగందూర్ సూర్యపై ప్రశంసల జల్లు కురిపించారు. మూడు దశాబ్దాల సినీ ప్రస్థానంలో సూర్య సౌకర్యాన్ని కాదని, ఎల్లప్పుడూ ధైర్యాన్ని, సత్యాన్ని ఆవిష్కరించే కథలనే ఎంచుకున్నారని కొనియాడారు. ఈ తరం అత్యంత నిర్భయ నటుడైన ‘ది వన్ – సూర్య’కు తమ నిర్మాణ సంస్థ తరఫున గర్వంగా స్వాగతం పలుకుతున్నట్లు ప్రకటించారు. తమ నిర్మాణ విలువలు, సూర్య అద్భుత నటన కలిసి ప్రేక్షకులకు ఒక మరపురాని సినిమాటిక్ అనుభూతిని అందిస్తాయని ధీమా వ్యక్తం చేశారు. త్వరలోనే ఈ చిత్రానికి సంబంధించిన టైటిల్, ఇతర వివరాలను అధికారికంగా వెల్లడించనున్నారు.
