నేషనల్ క్రష్ రష్మిక మందన్న ప్రధాన పాత్రలో నటిస్తున్న మోస్ట్ అవేటెడ్ యాక్షన్ థ్రిల్లర్ ‘మైసా’ (Maisa) చిత్రంపై ప్రేక్షకుల్లో భారీ అంచనాలు నెలకొన్నాయి. ఈ సినిమాకు దర్శకత్వం వహిస్తున్న రవీంద్ర పుల్లే తాజాగా సోషల్ మీడియాలో చేసిన ఒక ఆసక్తికరమైన పోస్ట్ నెట్టింట తీవ్ర ఉత్కంఠను రేపుతోంది. రష్మిక చేతి ముద్రలు ఉన్న ఓ షర్ట్ను ధరించిన ఫొటోను ఆయన షేర్ చేస్తూ.. “మైసాతో signature చేయించుకున్నా.. ఇక రక్తపు మరకలు రాబోతున్నాయి” అని వ్యాఖ్యానించారు. ఈ పోస్ట్కు రష్మిక కూడా సరదాగా స్పందిస్తూ.. “మనం ఈ అందమైన కళలో కొంచెం రక్తం, పసుపు కూడా కలిపి ఉండాల్సింది, తర్వాతిసారి కచ్చితంగా అలా చేద్దాం” అని కామెంట్ చేయడంతో ఈ సంభాషణ విపరీతంగా ట్రెండ్ అవుతోంది.
ఈ చిత్రంలో రష్మిక మందన్న మునుపెన్నడూ చూడని రీతిలో ఓ పవర్ఫుల్ గిరిజన యువతి పాత్రలో కనిపించనున్నారు. ఈ పాత్ర కోసం శారీరక దృఢత్వంతో పాటు కఠినమైన యాక్షన్ సన్నివేశాలు అవసరం కావడంతో రష్మిక ఎంతగానో శ్రమిస్తున్నారు. థాయ్లాండ్లోని బ్యాంకాక్లో ప్రత్యేకంగా ఏర్పాటు చేసిన ఇంటెన్సివ్ క్యాంప్లో ఆమె రోజుకు 8 గంటలకు పైగా కఠినమైన స్టంట్స్, మార్షల్ ఆర్ట్స్లో ప్రత్యేక శిక్షణ పొందారు. అంతర్జాతీయంగా గుర్తింపు పొందిన ప్రముఖ స్టంట్ కొరియోగ్రాఫర్ ఆండీ లాంగ్ ఈ సినిమా యాక్షన్ బ్లాక్స్ను పర్యవేక్షిస్తుండటం విశేషం.
ఈ చిత్రాన్ని ప్రముఖ నిర్మాణ సంస్థ ‘అన్ఫార్ములా ఫిల్మ్స్’ భారీ బడ్జెట్తో నిర్మిస్తోంది. కొద్ది నెలల క్రితమే కేరళలో ప్రముఖ స్టంట్ మాస్టర్ కెచా ఖంఫక్డీ నేతృత్వంలో హై-వోల్టేజ్ యాక్షన్ సీన్లను, అలాగే కొరియోగ్రాఫర్ బృందా మాస్టర్ సారథ్యంలో ఓ రొమాంటిక్ పాట చిత్రీకరణను చిత్ర యూనిట్ విజయవంతంగా పూర్తి చేసింది. ఈశ్వరీ రావు, గురు సోమసుందరం, రావు రమేశ్ లాంటి హేమాహేమీలు కీలక పాత్రలు పోషిస్తున్న ఈ చిత్రానికి జేక్స్ బిజోయ్ సంగీతాన్ని అందిస్తున్నారు. ప్రస్తుతం శరవేగంగా షూటింగ్ జరుపుకుంటున్న ‘మైసా’ చిత్రాన్ని 2026లోనే ప్రపంచవ్యాప్తంగా థియేటర్లలోకి తీసుకురానున్నట్లు నిర్మాతలు అధికారికంగా ప్రకటించారు.
