గత కొంతకాలంగా ‘నాంది’, ‘ఉగ్రం’ వంటి సీరియస్, ఇంటెన్స్ పాత్రలతో ప్రేక్షకులను మెప్పించిన ప్రముఖ నటుడు అల్లరి నరేశ్, మళ్లీ తన ట్రేడ్ మార్క్ కామెడీతో అలరించేందుకు సిద్ధమయ్యారు. ఆయన పుట్టినరోజు సందర్భంగా తన 65వ చిత్రానికి సంబంధించిన ఫస్ట్ లుక్ పోస్టర్ను చిత్రబృందం మంగళవారం విడుదల చేసింది. ఈ సినిమాకు ‘రంభ ఊర్వశి మేనక’ అనే ఆసక్తికరమైన టైటిల్ను ఖరారు చేశారు.
ఈ చిత్రాన్ని ఒక అవుట్ అండ్ అవుట్ సోషియో ఫాంటసీ ఎంటర్టైనర్గా రూపొందిస్తున్నారు. టైటిల్తోనే సినిమాలో కామెడీ, ఫాంటసీ అంశాలు పుష్కలంగా ఉంటాయని స్పష్టమవుతోంది. ప్రఖ్యాత నిర్మాణ సంస్థ అన్నపూర్ణ స్టూడియోస్, హాస్య మూవీస్ పతాకాలపై ఈ సినిమాను సంయుక్తంగా నిర్మిస్తున్నారు. చంద్రమోహన్ చింతాడ ఈ చిత్రానికి దర్శకత్వం వహిస్తున్నారు. నటుడిగా తనను తాను కొత్తగా ఆవిష్కరించుకునే క్రమంలో ఇటీవల నరేశ్ సీరియస్ కథలను ఎంచుకోగా, ఇప్పుడు మళ్లీ తన సొంత జానర్లోకి వస్తుండటంతో అభిమానులు సంతోషం వ్యక్తం చేస్తున్నారు.
ఈ క్రేజీ ప్రాజెక్ట్కు చైతన్ భరద్వాజ్ సంగీతం అందిస్తున్నారు. ప్రస్తుతం శరవేగంగా షూటింగ్ జరుపుకుంటున్న ఈ చిత్రం అన్ని కార్యక్రమాలను పూర్తి చేసుకుని, రాబోయే సెప్టెంబర్ 4న ప్రపంచవ్యాప్తంగా థియేటర్లలో భారీస్థాయిలో విడుదల కానున్నట్లు నిర్మాతలు అధికారికంగా ప్రకటించారు. ఈ చిత్రంతో అల్లరి నరేశ్ బాక్సాఫీస్ వద్ద మరోసారి నవ్వుల పండగ చేయడం ఖాయమని ఫస్ట్ లుక్ చూస్తేనే అర్థమవుతోంది.
