తమిళనాడు ముఖ్యమంత్రి జోసెఫ్ విజయ్ నేతృత్వంలోని టీవీకే (TVK) ప్రభుత్వం రాష్ట్రంలోని విద్యాసంస్థల విషయంలో ఒక కీలక నిర్ణయం తీసుకుంది. ఇకపై రాష్ట్రంలోని ప్రభుత్వ పాఠశాలలు, కాలేజీల ఆవరణల్లో ఎలాంటి రాజకీయ కార్యక్రమాలు లేదా ప్రైవేట్ ఈవెంట్లు నిర్వహించకూడదని నిషేధిస్తూ సర్క్యులర్ జారీ చేసింది. ఇటీవలే ముఖ్యమంత్రి విజయ్ పుట్టినరోజు వేడుకలను ప్రభుత్వ విద్యాసంస్థల ప్రాంగణాల్లో నిర్వహించడంపై మద్రాసు హైకోర్టులో ఒక ప్రజా ప్రయోజన వ్యాజ్యం (PIL) దాఖలైన నేపథ్యంలో, ప్రభుత్వం ఈ తప్పును సరిదిద్దుకునేలా తక్షణ చర్యలకు ఉపక్రమించింది.
ఈ వివాదానికి గల కారణాలను పరిశీలిస్తే.. జూన్ 22న సీఎం విజయ్ బర్త్ డే వేడుకల కోసం తిరువళ్లూరులోని ఒక ప్రభుత్వ పాఠశాలలో సుమారు 3 వేల మంది విద్యార్థులను ఎండలో కూర్చోబెట్టి, వారితో రాజకీయ నినాదాలు చేయించారనే ఆరోపణలు వచ్చాయి. దీనిపై గ్రేటర్ చెన్నై కార్పొరేటర్ కవి గణేషన్ మద్రాసు హైకోర్టును ఆశ్రయించగా, విచారణ చేపట్టిన ధర్మాసనం వివరణ ఇవ్వాలంటూ తమిళనాడు ప్రభుత్వానికి నోటీసులు జారీ చేసింది. కోర్టు ఆదేశాలపై స్పందించిన విద్యాశాఖ మంత్రి రాజ్మోహన్.. తాము న్యాయస్థానంలో చట్టబద్ధంగా సమాధానం ఇస్తామని, భవిష్యత్తులో అధికార పార్టీతో సహా ఏ రాజకీయ పక్షం కూడా స్కూల్స్, కాలేజీల ప్రాంగణాలను దుర్వినియోగం చేయకుండా గట్టి నిబంధనలు అమలు చేస్తామని స్పష్టం చేశారు.
తమిళనాడు ప్రభుత్వం తీసుకున్న ఈ నిర్ణయం గతంలో ఆంధ్రప్రదేశ్ ప్రభుత్వం అమలు చేసిన విద్యాసంస్థల రక్షణ మార్గదర్శకాలను పోలి ఉంది. ఏపీ ప్రభుత్వం జారీ చేసిన ఉత్తర్వుల ప్రకారం.. ప్రభుత్వ పాఠశాలల్లోకి కేవలం ఉపాధ్యాయులు, విద్యార్థుల తల్లిదండ్రులు, మేనేజ్మెంట్ కమిటీ సభ్యులకు మాత్రమే అనుమతి ఉంటుంది. రాజకీయ పార్టీల జెండాలు, బ్యానర్లు లోపలికి తీసుకురావడంపై మరియు విద్యార్థులతో బయటి వ్యక్తులు ఫోటోలు దిగడంపై కూడా అక్కడ పూర్తి నిషేధం ఉంది. ఇప్పుడు ముఖ్యమంత్రి విజయ్ సైతం అదే బాటలో నడుస్తూ, కేవలం ప్రభుత్వ అధికారిక కార్యక్రమాలకు వచ్చే ప్రజాప్రతినిధులను మాత్రమే విద్యాసంస్థల్లోకి అనుమతించేలా నూతన నిబంధనలను ఖరారు చేశారు.
