మహారాష్ట్రలోని ప్రముఖ పర్యాటక ప్రాంతమైన మల్షేజ్ ఘాట్ సమీపంలోని ‘కాలు జలపాతం’ వద్ద ఒక దిగ్భ్రాంతికర ఘటన వెలుగుచూసింది. వర్షాకాలంలో జలపాతం అందాలను ఆస్వాదించేందుకు వచ్చిన ఒక యువకుడు, సెల్ఫీ తీసుకునే క్రమంలో కాలు జారి వేగంగా ప్రవహిస్తున్న నీటితో పాటు లోయలోకి దొర్లుకుంటూ వెళ్లిపోయాడు. అయితే, అదృష్టవశాత్తూ చివరి క్షణంలో ఒక పెద్ద రాయి అతనికి చిక్కడంతో, దాన్ని గట్టిగా పట్టుకుని ఆర్తనాదాలు చేశాడు.
తాడు లేదా ఎలాంటి రక్షణ పరికరాలు అందుబాటులో లేకపోవడంతో, అక్కడే ఉన్న పర్యాటకులు అద్భుతమైన సమయస్ఫూర్తిని ప్రదర్శించారు. తమ వద్ద ఉన్న చీరలు, ఇతర దుస్తులను ఒకదానికొకటి ముడులు వేసి పొడవైన తాడులా తయారు చేశారు. తమ ప్రాణాలను సైతం లెక్కచేయకుండా లోయ అంచు వరకు వెళ్ళి, ఆ బట్టల తాడును కిందకు విసిరి యువకుడిని సురక్షితంగా పైకి లాగి ప్రాణాపాయం నుంచి కాపాడారు.
ఈ రెస్క్యూకి సంబంధించిన దృశ్యాలు ప్రస్తుతం సోషల్ మీడియాలో విపరీతంగా వైరల్ అవుతున్నాయి. పర్యాటకుల సమయస్ఫూర్తిని మరియు ధైర్యాన్ని నెటిజన్లు విశేషంగా ప్రశంసిస్తున్నారు. అదే సమయంలో సోషల్ మీడియా మోజులో పడి జలపాతాలు, కొండచరియల వద్ద ప్రాణాలను పణంగా పెట్టవద్దని నెటిజన్లు మరియు అధికారులు హెచ్చరిస్తున్నారు.
