స్టార్ హీరోయిన్ సమంత సరికొత్త అవతారంలో ప్రేక్షకులను అలరించేందుకు సిద్ధమయ్యారు. ప్రముఖ వంటల రియాలిటీ షో ‘సెలబ్రిటీ మాస్టర్‌చెఫ్’ తమిళ వెర్షన్‌కు ఆమె వ్యాఖ్యాతగా వ్యవహరించనున్నారు. ప్రముఖ ఓటీటీ ప్లాట్‌ఫామ్ ‘సోనీలివ్’ తమిళ్‌లో ఈ కార్యక్రమం ప్రసారం కానుండగా, దీనికి సంబంధించిన అధికారిక ప్రోమోను సోనీ పిక్చర్స్ నెట్‌వర్క్స్ ఇండియా తాజాగా విడుదల చేసింది.
బనిజయ్ ఆసియా సంస్థ ప్రతిష్టాత్మకంగా నిర్మిస్తున్న ఈ షోలో కోలీవుడ్ సినీ, టెలివిజన్ రంగాలకు చెందిన పలువురు ప్రముఖ సెలబ్రిటీలు పోటీదారులుగా పాల్గొననున్నారు. షూటింగ్‌లతో బిజీగా ఉండే తారలు వంటగదిలో ఎదురయ్యే సవాళ్లను ఎలా ఎదుర్కొంటారు, తమ పాకశాస్త్ర నైపుణ్యాలతో న్యాయనిర్ణేతలను ఎలా మెప్పిస్తారనేది ఈ షోలో ప్రధాన ఆకర్షణగా నిలవనుంది. త్వరలోనే ఈ కార్యక్రమం ప్రసార తేదీని అధికారికంగా ప్రకటించనున్నారు.
ఈ కొత్త బాధ్యతపై సమంత స్పందిస్తూ.. కెరీర్‌లో ఇప్పటివరకు ఇలాంటి భిన్నమైన వంటల రియాలిటీ షో చేయలేదని, అందుకే ఈ ప్రాజెక్ట్ రాగానే వెంటనే ఓకే చెప్పానని వెల్లడించారు. ఈ షో ద్వారా సెలబ్రిటీల సరికొత్త కోణాన్ని వీక్షించవచ్చని పేర్కొన్నారు. గతంలో ‘ది ఫ్యామిలీ మ్యాన్ 2’, ‘సిటాడెల్: హనీ బన్నీ’ వంటి భారీ వెబ్ సిరీస్‌లతో మెప్పించిన సమంత, మొదటిసారి ఒక రియాలిటీ షోకు హోస్ట్‌గా చేస్తుండటంతో అభిమానుల్లో భారీ అంచనాలు నెలకొన్నాయి.
