రక్షాబంధన్ యాడ్లో తాను ధరించిన దుస్తులు, తన పెంపుడు కుక్కకు రాఖీ కట్టడంపై వచ్చిన విమర్శలకు బాలీవుడ్ నటి కృతి సనన్ ఘాటుగా స్పందించారు. సంస్కృతి, సంప్రదాయాలను కేవలం దుస్తులను బట్టి అంచనా వేయడం సరికాదని ఆమె స్పష్టం చేశారు. మహిళలు ఏం ధరించాలో ఇతరులు నిర్ణయించే ధోరణిపై కూడా కృతి ప్రశ్నలు లేవనెత్తారు.
రక్షాబంధన్ సందర్భంగా ప్రముఖ ఆభరణాల బ్రాండ్ గివా కోసం రూపొందించిన ప్రకటనలో కృతి సనన్ ఆఫ్ వైట్ రంగు ఇండో-వెస్ట్రన్ దుస్తుల్లో కనిపించారు. బ్రాలెట్ తరహా బ్లౌజ్, కేప్, డ్రేప్డ్ స్కర్ట్తో ఉన్న ఆమె లుక్ కొందరికి నచ్చగా.. మరికొందరు మాత్రం తీవ్రంగా విమర్శించారు. సంప్రదాయ భారతీయ పండుగను ప్రతిబింబించే యాడ్లో ఇలాంటి దుస్తులు సరిపోవని పలువురు నెటిజన్లు అభిప్రాయపడ్డారు.
అంతేకాకుండా, కృతి తన పెంపుడు కుక్కకు రాఖీ కట్టడం కూడా సోషల్ మీడియాలో చర్చకు దారితీసింది. ఈ వివాదంలో నటి, రాజకీయ నాయకురాలు కంగనా రనౌత్ చేసిన వ్యాఖ్యలు కూడా వైరల్గా మారాయి. అయితే తన దుస్తులు లేదా వ్యక్తిగత నిర్ణయాలను ఆధారంగా చేసుకుని తన సంస్కృతిని అంచనా వేయడం సరికాదని కృతి స్పష్టం చేయడంతో ఈ అంశం మరోసారి చర్చనీయాంశంగా మారింది.
