హైదరాబాద్‌లోని శంషాబాద్ రాజీవ్ గాంధీ అంతర్జాతీయ విమానాశ్రయంలో డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ) అధికారులు భారీ ఎత్తున అంతర్జాతీయ డ్రగ్స్ స్మగ్లింగ్ రాకెట్‌ను గుట్టురట్టు చేశారు. అత్యాధునిక సాంకేతికతతో గీజర్‌లో అత్యంత గుట్టుచప్పుడు కాకుండా దాచి తరలిస్తున్న 7.750 కిలోల మేలిరకం హైడ్రోపోనిక్ గంజాయిని అధికారులు స్వాధీనం చేసుకున్నారు. సీజ్ చేసిన ఈ మత్తు పదార్థం విలువ అంతర్జాతీయ బ్లాక్ మార్కెట్‌లో సుమారు రూ. 2.71 కోట్లు ఉంటుందని అధికారులు ప్రాథమికంగా అంచనా వేశారు.
పక్కా నిఘా సమాచారం అందుకున్న డీఆర్ఐ హైదరాబాద్ జోనల్ యూనిట్ అధికారులు, అక్టోబర్ 12న బ్యాంకాక్ నుంచి వచ్చిన విమానంలో ప్రయాణించిన ఓ భారతీయ ప్రయాణికుడిని ప్రత్యేకంగా అడ్డగించి తనిఖీ చేశారు. అతని చెక్-ఇన్ బ్యాగేజీని స్క్రీనింగ్ చేయగా అందులో ఒక కొత్త ఎలక్ట్రిక్ గీజర్ బయటపడింది. అనుమానం వచ్చి ఆ గీజర్‌ను పూర్తిగా విప్పి చూడగా, లోపల మెటల్ ఛాంబర్‌లో అత్యంత పకడ్బందీగా దాచిన 73 ప్యాకెట్ల పచ్చని ముద్దలు వెలుగుచూశాయి. వెంటనే నార్కోటిక్ డ్రగ్స్ డిటెక్షన్ కిట్ ద్వారా పరీక్షించగా అది అధిక నాణ్యత కలిగిన హైడ్రోపోనిక్ గంజాయి అని నిర్ధారణ అయింది.
దీంతో సదరు ప్రయాణికుడిని నార్కోటిక్ డ్రగ్స్ అండ్ సైకోట్రోపిక్ సబ్‌స్టాన్సెస్ (ఎన్‌డీపీఎస్) చట్టం, 1985 నిబంధనల ప్రకారం డీఆర్ఐ అధికారులు తక్షణమే అరెస్ట్ చేసి రిమాండ్‌కు తరలించారు. పట్టుబడిన మొత్తం సరుకును సీజ్ చేసి, అంతర్జాతీయ స్మగ్లింగ్ నెట్‌వర్క్ లింకులపై లోతైన దర్యాప్తు ప్రారంభించారు. బ్యాంకాక్ నుంచి హైదరాబాద్ మీదుగా ఇతర ప్రధాన నగరాలకు ఈ తరహా ఖరీదైన గంజాయిని ఎవరికి చేరవేసేందుకు తీసుకొచ్చారనే కోణంలో విచారణ కొనసాగుతోందని, మరిన్ని అరెస్టులు జరిగే అవకాశముందని అధికారులు వెల్లడించారు.
