ప్రముఖ చెఫ్, మాస్టర్‌చెఫ్ ఇండియా సీజన్ 1 విజేత పంకజ్ భదౌరియా తన క్యాన్సర్ చికిత్సకు సంబంధించిన అనుభవాలను సోషల్ మీడియాలో పంచుకున్నారు. రెండో కీమోథెరపీ సెషన్, వరుస ఇన్ఫెక్షన్లు, జుట్టు రాలడం వంటి సమస్యలతో ఆగస్టు నెల తనకు ఎంతో సవాళ్లతో సాగిందని తెలిపారు. ఈ సమయంలో శారీరకంగా బలహీనంగా అనిపించినప్పటికీ.. కుటుంబ సభ్యుల అండతో చికిత్సను కొనసాగిస్తున్నట్లు పేర్కొన్నారు.
ఆసుపత్రి పడకపై ఉన్న ఫొటోను సోషల్ మీడియాలో షేర్ చేసిన పంకజ్.. రెండో కీమోథెరపీ తన ఆరోగ్యంపై తీవ్ర ప్రభావం చూపిందని వివరించారు. జుట్టు రాలడంతో పాటు పదేపదే ఇన్ఫెక్షన్లు రావడంతో ఇబ్బందులు ఎదుర్కొన్నానని చెప్పారు. తగిన జాగ్రత్తలు, నివారణ మందులు, అవసరమైన సంరక్షణ తీసుకున్నప్పటికీ ఇన్ఫెక్షన్లను ఎదుర్కోవాల్సి వచ్చిందని తెలిపారు.
అయితే దాదాపు మూడు నెలల తర్వాత కుటుంబంతో కలిసి బయటకు వెళ్లి భోజనం చేయడం తనకు ఎంతో ప్రత్యేకంగా అనిపించిందని పంకజ్ భదౌరియా చెప్పారు. కోలుకునే ప్రయాణంలో అది చిన్న ముందడుగులా భావిస్తున్నానని పేర్కొన్నారు. చికిత్సలో ఎదురవుతున్న సవాళ్లను ధైర్యంగా ఎదుర్కొంటూ.. త్వరగా సాధారణ జీవితానికి తిరిగి రావాలని ఆశిస్తున్నట్లు ఆమె అనుభవాలు తెలియజేస్తున్నాయి.
