అమరావతి ప్రాంతంలోని యువతకు ఉపాధి అవకాశాలను మెరుగుపరిచే లక్ష్యంతో ఆంధ్రప్రదేశ్ రాజధాని ప్రాంత అభివృద్ధి ప్రాధికార సంస్థ (APCRDA) కీలక అవకాశాన్ని అందిస్తోంది. రాజధాని నిర్మాణంలో స్థానిక యువతను భాగస్వామ్యం చేయడంతో పాటు వారి వృత్తిపరమైన నైపుణ్యాలను పెంపొందించేందుకు ఉచిత డేటా ఎంట్రీ ఆపరేటర్‌ కోర్సును ప్రారంభించనుంది. సెప్టెంబర్‌ 10 నుంచి ప్రారంభమయ్యే ఈ శిక్షణ దాదాపు రెండు నెలల పాటు కొనసాగనుంది.
అమరావతి పరిధిలోని 18 నుంచి 45 ఏళ్ల వయస్సు కలిగిన అర్హులైన యువతీ యువకులు ఈ శిక్షణకు హాజరుకావచ్చని అధికారులు తెలిపారు. శిక్షణలో భాగంగా కోడింగ్‌, డేటా మేనేజ్‌మెంట్‌, ప్రాథమిక కంప్యూటర్‌ నైపుణ్యాలపై నిపుణుల ఆధ్వర్యంలో శిక్షణ అందించనున్నారు. తద్వారా అభ్యర్థులు భవిష్యత్తులో ఉద్యోగ అవకాశాలను పొందేందుకు అవసరమైన నైపుణ్యాలను అభివృద్ధి చేసుకునే అవకాశం ఉంటుంది.
ఈ కోర్సును ఎలాంటి ఆర్థిక భారం లేకుండా పూర్తిగా ఉచితంగా అందించనున్నారు. అంతేకాకుండా శిక్షణా కేంద్రానికి వచ్చి వెళ్లే అభ్యర్థుల కోసం రవాణా సౌకర్యం లేదా రవాణా భత్యాన్ని కూడా APCRDA కల్పించనుంది. కోర్సును విజయవంతంగా పూర్తి చేసిన వారికి ప్రభుత్వం ఆమోదించిన సర్టిఫికెట్‌ అందజేయనున్నట్లు అధికారులు వెల్లడించారు.
