కన్నడ ప్రముఖ నటుడు శివరాజ్‌కుమార్ తన తాజా పాన్-ఇండియా చిత్రం ‘ఒరిజినల్ మాన్‌స్ట‌ర్’ టైటిల్ లాంచ్ కార్యక్రమంలో చేసిన వ్యాఖ్యలు కర్ణాటకలో తీవ్ర అసంతృప్తికి, వివాదానికి దారితీశాయి. బాలీవుడ్ ఎంట్రీ, హిందీలో డైలాగులు చెప్పడంపై మీడియా ప్రతినిధులు అడిగిన ప్రశ్నకు ఆయన బదులిస్తూ.. హిందీ చాలా సులువైన భాష అని, అది మన రెండో భాషతో పాటు ‘జాతీయ భాష’ అని, తనకు హిందీ బాగా వచ్చని పేర్కొన్నారు. ఈ వీడియో దృశ్యాలు సామాజిక మాధ్యమాల్లో వైరల్ కావడంతో కన్నడ భాషాభిమానులు, స్థానిక సంస్కృతీ పరిరక్షకులు ఆయన వ్యాఖ్యలపై తీవ్రస్థాయిలో మండిపడుతున్నారు.
భారత రాజ్యాంగం ప్రకారం దేశానికి అధికారిక ‘జాతీయ భాష’ ఏదీ లేదని, అన్ని ప్రాంతీయ భాషలకు సమాన గుర్తింపు, ప్రాధాన్యం ఉన్నాయని నెటిజన్లు గుర్తుచేస్తున్నారు. కన్నడ సినీ దిగ్గజ కుటుంబానికి చెందిన హీరో అయి ఉండి ఈ ప్రాథమిక స్పృహ లేకుండా మాట్లాడటం సరికాదని విమర్శిస్తున్నారు. ముఖ్యంగా దివంగత లెజెండరీ నటుడు డాక్టర్ రాజ్‌కుమార్ కన్నడ భాషా ఉద్యమాల్లో నిర్వహించిన చారిత్రక పోరాటాలను ప్రస్తావిస్తూ, శివరాజ్‌కుమార్ వ్యాఖ్యలు ఆయన వారసత్వాన్ని కించపరిచేలా ఉన్నాయని అసహనం వ్యక్తం చేస్తున్నారు.
మరోవైపు శివరాజ్‌కుమార్ అభిమానులు ఆయనకు అండగా నిలుస్తున్నారు. దేశవ్యాప్తంగా విస్తృత గుర్తింపు ఉన్న అనుసంధాన భాష అనే భావనతోనే ఆయన ఆ వ్యాఖ్యలు చేశారని, కన్నడ భాషను లేదా స్థానిక ప్రజల మనోభావాలను కించపరచాలనే దురుద్దేశం ఆయనకు లేదని సమర్థిస్తున్నారు. ఆర్. చంద్రు దర్శకత్వంలో 1990-2000 కాలం నాటి యాక్షన్ డ్రామా నేపథ్యంతో తెరకెక్కుతున్న ‘ఒరిజినల్ మాన్‌స్ట‌ర్’ ద్వారా శివరాజ్‌కుమార్ హిందీ చిత్ర పరిశ్రమలోకి అడుగుపెడుతున్న కీలక తరుణంలో ఈ వివాదం రాజుకోవడం సర్వత్రా చర్చనీయాంశంగా మారింది.
