ప్రఖ్యాత ఆచార్య నాగార్జున యూనివర్సిటీ (ఏఎన్‌యూ) 50 ఏళ్ల ఘనమైన విద్యా ప్రస్థానాన్ని పురస్కరించుకుని రూపొందించిన ప్రత్యేక పోస్టల్ స్టాంప్‌ను ఆంధ్రప్రదేశ్ ఐటీ, విద్యాశాఖ మంత్రి నారా లోకేశ్ ఘనంగా ఆవిష్కరించారు. వెలగపూడి సచివాలయంలో జరిగిన ఈ ప్రత్యేక కార్యక్రమంలో వర్సిటీ స్వర్ణోత్సవ (గోల్డెన్ జూబ్లీ) వేడుకలు విద్యా చరిత్రలో చిరకాలం గుర్తుండిపోయేలా ఈ మైలురాయిని గౌరవిస్తూ పోస్టల్ స్టాంప్‌ను అధికారికంగా విడుదల చేశారు. ఈ చారిత్రక ఘట్టాన్ని మంత్రి లోకేశ్ తన సోషల్ మీడియా వేదికల ద్వారా పంచుకుంటూ వర్సిటీ ప్రస్థానాన్ని కొనియాడారు.
గడిచిన ఐదు దశాబ్దాల కాలంలో ఆచార్య నాగార్జున విశ్వవిద్యాలయం సాధించిన విశేష విజయాలు, ఉన్నత విద్యారంగానికి అందించిన నిరుపమాన సేవలను యూనివర్సిటీ ప్రతినిధులు, ఉన్నతాధికారులు ఈ సందర్భంగా మంత్రికి వివరించారు. గోల్డెన్ జూబ్లీ ఉత్సవాల సందర్భంగా విద్యార్థులు, పూర్వ విద్యార్థులు, అధ్యాపక బృందంతో కలిసి చేపట్టనున్న పలు ప్రత్యేక విద్యా, సాంస్కృతిక కార్యక్రమాల కార్యాచరణ ప్రణాళికను కూడా విద్యాశాఖ మంత్రి దృష్టికి తీసుకెళ్లారు.
సచివాలయంలో నిర్వహించిన ఈ ఆవిష్కరణ కార్యక్రమంలో విద్యాశాఖ ముఖ్య కార్యదర్శి శ్యామలరావు, ఉన్నత విద్యామండలి కమిషనర్ నారాయణ భరత్ గుప్తా, ఆచార్య నాగార్జున వర్సిటీ వైస్ ఛాన్సలర్ ప్రొఫెసర్ కె. గంగాధర రావు, రెక్టార్ ఆర్. శివరామ్ ప్రసాద్, రిజిస్ట్రార్ జి. సింహాచలంతో పాటు పలువురు విద్యాశాఖ, తపాలా శాఖ ఉన్నతాధికారులు పాల్గొని కార్యక్రమాన్ని విజయవంతం చేశారు.
