మెగాస్టార్ చిరంజీవి కథానాయకుడిగా దర్శకుడు బాబీ (కె.ఎస్. రవీంద్ర) కాంబినేషన్‌లో తెరకెక్కుతున్న భారీ పాన్-ఇండియా చిత్రం ‘కాకా’ (Kaka) విడుదల తేదీ అధికారికంగా ఖరారైంది. చిత్ర నిర్మాణ సంస్థ కేవీఎన్ ప్రొడక్షన్స్ (KVN Productions) సోషల్ మీడియా వేదికగా ప్రకటన చేస్తూ.. అన్ని రకాల ఊహాగానాలకు తెరదించుతూ 2027 సంక్రాంతి కానుకగా జనవరి 13న ఈ చిత్రాన్ని ప్రపంచవ్యాప్తంగా గ్రాండ్‌గా రిలీజ్ చేయనున్నట్లు వెల్లడించింది. ఈ అనౌన్స్‌మెంట్‌తో మెగా అభిమానుల్లో సంక్రాంతి జోష్ మొదలైంది.
గతంలో చిరంజీవి, బాబీ కలయికలో సంక్రాంతికి వచ్చిన ‘వాల్తేరు వీరయ్య’ బాక్సాఫీస్ వద్ద రికార్డు స్థాయి వసూళ్లతో బ్లాక్‌బస్టర్‌గా నిలిచిన సంగతి తెలిసిందే. సరిగ్గా అదే కాంబో మరోసారి పండగ బరిలో దిగుతుండటంతో చిత్ర పరిశ్రమతో పాటు ట్రేడ్ వర్గాల్లో అంచనాలు తారాస్థాయికి చేరాయి. నిర్మాత వెంకట్ నారాయణ అత్యంత భారీ బడ్జెట్, అత్యాధునిక సాంకేతిక విలువలతో ఈ ప్రాజెక్ట్‌ను రూపొందిస్తున్నారు.
విడుదల తేదీని ప్రకటించడంతో పాటు అతి త్వరలోనే చిత్రంలోని మొదటి పాట (ఫస్ట్ సింగిల్) అప్‌డేట్ ఇవ్వనున్నట్లు నిర్మాతలు పేర్కొన్నారు. ‘వాల్తేరు వీరయ్య’ సెంటిమెంట్ రిపీట్ కానుండటం, త్వరలోనే ప్రమోషన్ల పర్వం ఊపందుకోనుండటంతో సోషల్ మీడియాలో #KAAKA ట్రెండింగ్‌గా మారింది. బాక్సాఫీస్ వద్ద మరోసారి మెగా జాతర ఖాయమని ఫ్యాన్స్ ధీమా వ్యక్తం చేస్తున్నారు.
