ఆంధ్రప్రదేశ్‌లో ఎన్టీఆర్ భరోసా సామాజిక పింఛన్ల పంపిణీ విధానంలో ప్రభుత్వం కీలక మార్పులు తీసుకొచ్చింది. అక్టోబర్ 1వ తేదీ నుంచి జాతీయ సామాజిక సహాయ కార్యక్రమం (NSAP) పరిధిలోకి వచ్చే లబ్ధిదారులకు కేంద్ర ప్రభుత్వ వాటా నగదును నేరుగా వారి ఆధార్ అనుసంధానిత బ్యాంకు ఖాతాల్లోనే జమ చేయనున్నారు. అయితే, లబ్ధిదారులకు ఎలాంటి అసౌకర్యం కలగకుండా రాష్ట్ర ప్రభుత్వం అందించే ప్రధాన వాటాను మాత్రం యథావిధిగా గ్రామ, వార్డు సచివాలయాల సిబ్బంది ద్వారా లబ్ధిదారుల ఇంటి వద్దకే వచ్చి నగదు రూపంలో అందజేస్తారు.
కేంద్ర ప్రాయోజిత పథకాల నిధులను తప్పనిసరిగా ప్రత్యక్ష నగదు బదిలీ (DBT) విధానంలోనే లబ్ధిదారులకు చేరవేయాలన్న కేంద్ర ప్రభుత్వ మార్గదర్శకాలకు అనుగుణంగా ఈ నిర్ణయం తీసుకున్నారు. రాష్ట్రంలో మొత్తం 62 లక్షల మందికి పైగా పింఛన్‌దారులు ఉండగా, కేంద్ర పథకం పరిధిలోకి వచ్చే సుమారు 9.34 లక్షల మంది వృద్ధులు, వితంతువులు, దివ్యాంగులకు మాత్రమే ఈ నూతన విధానం వర్తిస్తుంది. ఉదాహరణకు, నెలకు రూ. 4,000 పింఛన్ అందుకునే వృద్ధులకు కేంద్రం వాటా రూ. 200 బ్యాంకు ఖాతాలో జమ కాగా, మిగిలిన రూ. 3,800 మొత్తాన్ని రాష్ట్ర ప్రభుత్వం ఎప్పటిలాగే ఇంటి వద్దే నేరుగా చేతికి అందిస్తుంది. మిగిలిన దాదాపు 53 లక్షల మంది లబ్ధిదారులకు పూర్తి మొత్తం యథావిధిగా ఇంటి వద్దే అందుతుంది.
ఈ నూతన విధానం వల్ల ఎలాంటి ఇబ్బందులు తలెత్తకుండా ఉండేందుకు లబ్ధిదారులు తమ బ్యాంకు ఖాతాలకు ఆధార్ అనుసంధానం (Aadhaar Seeding) సరిగ్గా ఉందో లేదో సరిచూసుకుని, ఖాతాలను యాక్టివ్‌గా ఉంచుకోవాలని మంత్రి కొండపల్లి శ్రీనివాస్ సూచించారు. బ్యాంకు ఖాతాలో కేంద్రం వాటా సొమ్ము జమ అయిన వెంటనే లబ్ధిదారుల మొబైల్ నంబర్లకు ఎస్ఎంఎస్ (SMS) ద్వారా సమాచారం అందుతుందని అధికారులు స్పష్టం చేశారు. ఎవరైనా లబ్ధిదారులకు ఖాతాల్లో సాంకేతిక సమస్యలుంటే సచివాలయ సిబ్బందిని సంప్రదించి పరిష్కరించుకోవాలని సూచించారు.
