తెలంగాణవ్యాప్తంగా వినాయక చవితి శోభాయాత్రలు, నిమజ్జన కార్యక్రమాలు శాంతిభద్రతల సమస్యలు తలెత్తకుండా ప్రశాంత వాతావరణంలో ముగిశాయని రాష్ట్ర డైరెక్టర్ జనరల్ ఆఫ్ పోలీస్ (డీజీపీ) సీవీ ఆనంద్ వెల్లడించారు. జియో ట్యాగింగ్ మరియు అధికారిక పోర్టల్ డేటా ప్రకారం ఈ ఏడాది రాష్ట్రంలో బహిరంగ ప్రదేశాల్లో 1.24 లక్షల మండప విగ్రహాలు నమోదయ్యాయని, గతేడాది నమోదైన 1.15 లక్షలతో పోలిస్తే ఈసారి సంఖ్య గణనీయంగా పెరిగిందని తెలిపారు. అలాగే గేటెడ్ కమ్యూనిటీలు, అపార్ట్‌మెంట్లు మరియు గృహ ప్రాంగణాల్లో పూజలందుకున్న ప్రతిమలను కూడా పరిగణనలోకి తీసుకుంటే రాష్ట్రవ్యాప్తంగా దాదాపు 3.50 లక్షల నుంచి 4 లక్షల వరకు విగ్రహాల నిమజ్జనం పూర్తయి ఉండవచ్చని ఆయన అంచనా వేశారు.
అయితే, రాష్ట్రవ్యాప్తంగా ఉత్సవాలు అత్యంత వైభవంగా సాగినప్పటికీ, కొన్ని ప్రాంతాల్లో చోటుచేసుకున్న ఊహించని ప్రమాదాలు తీవ్ర ఆవేదనకు గురిచేశాయని డీజీపీ పేర్కొన్నారు. విధి నిర్వహణలో ఉన్న భద్రాద్రి కొత్తగూడెం జిల్లాకు చెందిన ఎస్సై వెంకన్నతో పాటు వివిధ జిల్లాల్లో జరిగిన వేర్వేరు దుర్ఘటనల్లో మొత్తం 13 మంది ప్రాణాలు కోల్పోవడం అత్యంత బాధాకరమని తెలిపారు. సంగారెడ్డి జిల్లా పటాన్‌చెరు పరిధిలో జరిగిన ఘోర ప్రమాదంలో ఆరుగురు దుర్మరణం పాలవగా.. పలుచోట్ల నిబంధనలకు విరుద్ధంగా మోగించిన తీవ్రస్థాయి డీజే శబ్దాల ఒత్తిడి తట్టుకోలేక కొందరు గుండెపోటుతో, ఊరేగింపుల్లో జరిగిన ప్రమాదాల వల్ల మరికొందరు మృత్యువాత పడ్డారని వివరించారు.
నిమజ్జన వేడుకల సమయంలో రాష్ట్రంలోని వేర్వేరు ప్రాంతాల్లో జరిగిన ప్రమాదాల్లో మరో 26 మంది తీవ్రంగా గాయపడ్డారని డీజీపీ తెలిపారు. క్షతగాత్రులందరికీ సమీప ఆసుపత్రుల్లో మెరుగైన వైద్య సదుపాయాలు అందిస్తున్నట్లు స్పష్టం చేశారు. లక్షలాది మంది తరలివచ్చిన ఈ మహా క్రతువును విజయవంతంగా పూర్తి చేయడానికి అహర్నిశలు శ్రమించిన పోలీసు అధికారులు, సిబ్బంది, జీహెచ్‌ఎంసీ మరియు ఇతర శాఖల సమన్వయాన్ని ప్రశంసిస్తూనే, ప్రమాదాల బారిన పడి ప్రాణాలు కోల్పోయిన వారి కుటుంబాలకు ఆయన ప్రగాఢ సానుభూతి తెలియజేశారు.
