దేవీ శరన్నవరాత్రులు, విజయదశమి పండుగ వేళ తెలుగు రాష్ట్రాల ప్రజలను మరోసారి ప్రకృతి విపత్తు భయం వెంటాడుతోంది. రాబోయే దసరా సమయానికి బంగాళాఖాతంలోని ఉత్తర అండమాన్ సముద్రంలో కొత్తగా అల్పపీడనం ఏర్పడే అవకాశం ఉందని వాతావరణ నిపుణులు ప్రాథమికంగా అంచనా వేస్తున్నారు. ఈ నెల 13 నాటికి ఇది రూపుదిద్దుకుని, ఆ తర్వాతి రెండు రోజుల్లో మరింత బలపడి వాయుగుండంగా మారే సూచనలు కనిపిస్తున్నాయి. గతంలో అక్టోబర్ మాసంలోనే పైలిన్ (2013), హుద్‌హుద్ (2014), తిత్లీ (2018) వంటి పెను తుపాన్లు తెలుగు రాష్ట్రాలతో పాటు ఒడిశా తీరాలపై విరుచుకుపడి తీవ్ర విధ్వంసం సృష్టించిన చేదు అనుభవాలు ఉండటంతో తీర ప్రాంత ప్రజల్లో కలవరం మొదలైంది.
దేశవ్యాప్తంగా శరన్నవరాత్రి ఉత్సవాలను అత్యంత వైభవంగా నిర్వహించేందుకు ఏర్పాట్లు ముమ్మరంగా సాగుతున్నాయి. వేలాది దుర్గామాత మండపాలను తీర్చిదిద్ది భక్తులు పూజలకు సిద్ధమవుతున్న సమయంలో తుపాను లేదా కుండపోత వర్షాలు ముంచెత్తితే ఉత్సవాలకు తీవ్ర ఆటంకం కలుగుతుందని భయాందోళనలు వ్యక్తమవుతున్నాయి. ప్రస్తుత వర్షాకాలంలో గడిచిన మూడు నెలల వ్యవధిలోనే బంగాళాఖాతంలో ఇప్పటికే 9 అల్పపీడనాలు, 3 వాయుగుండాలు ఏర్పడటంతో ఏపీలో భారీ వర్షాలు, తీవ్ర వరదలు సంభవించాయి. ఆ విలయం నుంచి ప్రజలు ఇప్పుడిప్పుడే సాధారణ స్థితికి చేరుకుంటున్న వేళ.. మరో వాతావరణ ముప్పు వార్త ఉత్సవ కమిటీలను, సాధారణ ప్రజలను టెన్షన్‌కు గురిచేస్తోంది.
అయితే, ఈ అల్పపీడనం తుపానుగా బలపడుతుందా లేదా అనే అంశంపై స్పష్టత రావడానికి మరో కొన్ని రోజుల సమయం పడుతుందని నిపుణులు చెబుతున్నారు. ప్రస్తుతానికి రాబోయే వారం రోజుల పాటు రాష్ట్రంలో వాతావరణం పొడిగానే కొనసాగుతుందని, అక్కడక్కడా ఉరుములతో కూడిన మోస్తరు జల్లులు మినహా తీవ్ర ముప్పు ఏమీ ఉండదని వాతావరణ నిపుణులు స్పష్టం చేశారు. విదేశీ, స్వదేశీ వాతావరణ సంస్థలు దీని గమనాన్ని నిరంతరం పర్యవేక్షిస్తున్నాయని, భారత వాతావరణ శాఖ (IMD) అధికారిక సమాచారం ఇచ్చేంతవరకు ప్రజలు ఎలాంటి అసత్య ప్రచారాలను, వదంతులను నమ్మవద్దని అధికారులు సూచించారు.
