తెలంగాణ ముఖ్యమంత్రి ఎ. రేవంత్ రెడ్డి రాష్ట్రానికి దక్కాల్సిన కృష్ణా జలాలను గిఫ్ట్ ప్యాక్ చేసి ఆంధ్రప్రదేశ్ ముఖ్యమంత్రి చంద్రబాబు నాయుడికి పంపిస్తున్నారని బీఆర్ఎస్ ఎమ్మెల్సీ కల్వకుంట్ల కవిత తీవ్రస్థాయిలో ధ్వజమెత్తారు. ఆదివారం హైదరాబాద్ బంజారాహిల్స్‌లోని పార్టీ కార్యాలయంలో నిర్వహించిన మీడియా సమావేశంలో ఆమె మాట్లాడారు. మన కృష్ణా నది నీళ్లు పొరుగు రాష్ట్రంలోని కుప్పం నియోజకవర్గానికి తరలిపోతుంటే, మహబూబ్‌నగర్ జిల్లా రైతులకు మాత్రం సాగునీరు అందక తీవ్ర ఇబ్బందులు పడుతున్నారని ఆవేదన వ్యక్తం చేశారు. కాంగ్రెస్ ప్రభుత్వం సాగునీటి ప్రాజెక్టులను పూర్తిగా గాలికొదిలేయడం వల్లే రాష్ట్రంలో నేడు తీవ్ర కరవు పరిస్థితులు నెలకొన్నాయని ఆరోపించారు.
రాష్ట్రంలో ఎండలు, ఎల్ నినో ప్రభావంపై శాస్త్రవేత్తలు ముందుగానే హెచ్చరించినప్పటికీ ప్రభుత్వం ఎలాంటి ముందస్తు ప్రణాళికలు రూపొందించలేకపోయిందని కవిత విమర్శించారు. ఇటీవల జరిగిన క్యాబినెట్ భేటీలోనూ కరవు మండలాలను ప్రకటించకపోవడం రైతుల పట్ల పాలకుల నిర్లక్ష్యానికి నిదర్శనమని మండిపడ్డారు. నార్లాపూర్ రిజర్వాయర్‌కు కొద్దిపాటి నిధులు కేటాయించి ఉంటే కల్వకుర్తి ఆయకట్టుకు నీరంది భూగర్భ జలాలు పెరిగేవని గుర్తుచేశారు. కృష్ణా, గోదావరి నదుల్లో నీటి లభ్యత ఉన్నప్పటికీ పాలమూరు-రంగారెడ్డి వంటి కీలక ఎత్తిపోతల ప్రాజెక్టులను నింపకుండా తెలంగాణ ప్రయోజనాలను పణంగా పెడుతున్నారని దుయ్యబట్టారు.
వ్యవసాయ రంగానికి 24 గంటల నిరంతర ఉచిత విద్యుత్ ఇస్తామని హామీ ఇచ్చిన కాంగ్రెస్.. ప్రస్తుతం కేవలం 6 నుంచి 7 గంటలు మాత్రమే విద్యుత్ సరఫరా చేస్తూ తీవ్ర కోతలు విధిస్తోందని ఆగ్రహం వ్యక్తం చేశారు. రైతులతో పాటు హైదరాబాద్ సహా ఇతర ప్రధాన పట్టణాల్లో తాగునీటి ఎద్దడి రోజురోజుకూ తీవ్రమవుతోందని ఆందోళన చెందారు. ప్రభుత్వం తక్షణమే కరవు సహాయక చర్యలు చేపట్టాలని, రైతులకు నష్టపరిహారం చెల్లించాలని డిమాండ్ చేశారు. కష్టాల్లో ఉన్న అన్నదాతలకు తమ పార్టీ అండగా ఉంటుందని, 60 నియోజకవర్గాల్లో పార్టీ ఇన్‌చార్జ్‌లు క్షేత్రస్థాయిలో పర్యటించి ప్రజా సమస్యలపై పోరాడతారని కవిత స్పష్టం చేశారు.
