మొబైల్ వినియోగదారులపై మరోసారి రీఛార్జ్ ధరల భారం పడే అవకాశం కనిపిస్తోంది. వచ్చే నాలుగైదు నెలల్లో దేశంలోని ప్రముఖ టెలికాం కంపెనీలు తమ టారిఫ్ ప్లాన్‌ల ధరలను పెంచే అవకాశాలున్నట్లు నివేదికలు వెల్లడిస్తున్నాయి. దీంతో మొబైల్ రీఛార్జ్ ఖర్చులు మరింత పెరగనున్నాయి.
సెంట్రమ్ ఇన్‌స్టిట్యూషనల్ రీసెర్చ్ నివేదిక ప్రకారం జియో, ఎయిర్‌టెల్, వొడాఫోన్ ఐడియా సంస్థలు తమ రీఛార్జ్ ప్లాన్‌ల ధరలను 12 నుంచి 15 శాతం వరకు పెంచే అవకాశం ఉంది. గతంలోనూ టెలికాం సంస్థలు టారిఫ్‌లను పెంచిన నేపథ్యంలో తాజా పెంపు వినియోగదారులపై అదనపు భారాన్ని మోపే అవకాశం ఉంది.
అయితే ఈ ధరల పెంపుపై ఆయా టెలికాం సంస్థల నుంచి అధికారిక ప్రకటన వెలువడాల్సి ఉంది. టారిఫ్‌లు పెరిగితే నెలవారీ, వార్షిక రీఛార్జ్ ప్లాన్‌లపై వినియోగదారులు మరింత ఖర్చు చేయాల్సి రావచ్చు. దీంతో రాబోయే నెలల్లో టెలికాం టారిఫ్‌లపై మరింత స్పష్టత వచ్చే అవకాశం ఉంది.
