“ఈసీకి కమల్ హాసన్ సంచలన లేఖ”: ప్రతిపక్ష ఎంపీలతో భేటీ కావాలని సీఈసీకి విజ్ఞప్తి.. ఓట్ల తొలగింపుపై తీవ్ర ఆందోళన!

భారత ఎన్నికల సంఘం పనితీరు, నిష్పాక్షికతపై రాజ్యసభ సభ్యుడు, ప్రముఖ నటుడు కమల్ హాసన్ తీవ్ర ఆందోళన వ్యక్తం చేశారు. ప్రస్తుతం ఎన్నికల కమిషన్ వ్యవహారశైలిపై ప్రజల్లో, రాజకీయ పక్షాల్లో తలెత్తుతున్న పలు అనుమానాలను నివృత్తి చేయాల్సిన బాధ్యత కమిషన్‌పై ఉందని ఆయన స్పష్టం చేశారు. ఈ మేరకు విపక్ష ఎంపీలతో ప్రత్యేక సమావేశం ఏర్పాటు చేసి సమస్యలపై చర్చించాలని కోరుతూ ప్రధాన ఎన్నికల కమిషనర్ (సీఈసీ) జ్ఞానేష్ కుమార్‌కు ఆయన అధికారికంగా లేఖ రాసి, ఆ వివరాలను తన సోషల్ మీడియా వేదికగా వెల్లడించారు.

ఓటర్ల జాబితా ప్రత్యేక సవరణ ప్రక్రియను అత్యంత హడావుడిగా నిర్వహించడం వల్ల సమాజంలోని నిరుపేదలు, అణగారిన వర్గాల ఓట్లు గల్లంతయ్యే ప్రమాదం ఉందని కమల్ హెచ్చరించారు. ఓటరు నమోదు దరఖాస్తుల్లో చేస్తున్న మార్పులతో పాటు, ఎన్నికల ప్రవర్తనా నియమావళి (MCC) అమలులో పక్షపాత వైఖరి ప్రదర్శించడం వంటి అంశాలు ప్రజాస్వామ్య వ్యవస్థల విశ్వసనీయతను ప్రశ్నార్థకం చేస్తున్నాయని లేఖలో తీవ్రస్థాయిలో ప్రస్తావించారు. రాజ్యాంగబద్ధమైన పౌరుల ఓటు హక్కుకు భరోసా కల్పించాల్సిన గురుతర బాధ్యత ఎన్నికల సంఘానిదేనని ఆయన గుర్తుచేశారు.

గతంలో ఎన్నికల సంఘం అధికారులను కలిసేందుకు వెళ్లిన విపక్ష నేతలను నడిరోడ్డుపై అడ్డుకుని అదుపులోకి తీసుకున్న పరిణామాలను కమల్ గుర్తుచేస్తూ.. ఘర్షణల కంటే పరస్పర చర్చల ద్వారానే ప్రతి సమస్యకూ పరిష్కారం లభిస్తుందని అభిప్రాయపడ్డారు. ఈ నేపథ్యంలో పార్లమెంటులోని సంవిధాన్ భవన్‌లో ప్రతిపక్ష ఎంపీలతో ప్రత్యేక భేటీ ఏర్పాటు చేసి వారి అభ్యంతరాలను స్వయంగా ఆలకించాలని సీఈసీని కోరారు. ఎన్నికల సంఘం నిష్పక్షపాతంగా వ్యవహరించినప్పుడే దేశంలో ప్రజాస్వామ్య విలువలపై సామాన్య పౌరులకు సంపూర్ణ విశ్వాసం కలుగుతుందని ఆయన తేల్చి చెప్పారు.