దేశ రాజధాని న్యూఢిల్లీలో విపక్ష నేతల నిరసన సందర్భంగా ఢిల్లీ పోలీసులు వ్యవహరించిన తీరుపై కాంగ్రెస్ ప్రధాన కార్యదర్శి ప్రియాంకా గాంధీ వాద్రా తీవ్రస్థాయిలో విరుచుకుపడ్డారు. ప్రధాన ఎన్నికల కమిషనర్‌ను (సీఈసీ) కలిసి వినతిపత్రం అందజేసేందుకు శాంతియుతంగా వెళ్తున్న ప్రతిపక్ష ఎంపీలు, అగ్ర నాయకులను పోలీసులు అడ్డుకుని నిర్బంధించడాన్ని ఆమె తీవ్రంగా ఆక్షేపించారు. అరెస్టు చేసే క్రమంలో జరిగిన తోపులాటపై మండిపడుతూ.. “ప్రజాస్వామ్యబద్ధంగా ఎన్నికైన ప్రజాప్రతినిధులతో వ్యవహరించే తీరు ఇదేనా? మాపై దాడులు చేస్తారా? రోడ్లపై ఈడ్చి పారేస్తారా? సీఈసీకి విజ్ఞప్తి అందజేయాలని కోరడం మేము చేసిన నేరమా?” అంటూ ప్రియాంక పోలీసు యంత్రాంగాన్ని సూటిగా ప్రశ్నించారు.
మరోవైపు శాంతిభద్రతల పరిరక్షణ దృష్ట్యా జంతర్ మంతర్ పరిసరాల్లో సెక్షన్ 144 అమల్లో ఉందని, ముందస్తు అనుమతి లేకుండా ఎలాంటి నిరసనలు, ప్రదర్శనలు నిర్వహించడానికి వీల్లేదని ఢిల్లీ పోలీసులు స్పష్టం చేశారు. అనుమతులు లేకపోవడం వల్లే విపక్ష నాయకులను ముందస్తుగా అదుపులోకి తీసుకోవాల్సి వచ్చిందని అధికారులు సమర్థించుకున్నారు. అయితే పోలీసుల తీరును కాంగ్రెస్ శ్రేణులు తీవ్రంగా ఖండించాయి. ఓటర్ల జాబితా సవరణల్లో అవకతవకలు, ఎన్నికల సంఘం పక్షపాత వైఖరిపై రాజ్యాంగబద్ధంగా గళమెత్తేందుకు ప్రత్యేక అనుమతులు అవసరం లేదని తేల్చి చెప్పారు.
ప్రభుత్వం ఎన్ని అణచివేత చర్యలకు పాల్పడినా ప్రజాస్వామ్య పరిరక్షణ కోసం సాగిస్తున్న పోరాటాన్ని ఆపే ప్రసక్తే లేదని, బీజేపీ అధికార దౌర్జన్యాలకు భయపడేది లేదని ప్రియాంకా గాంధీ స్పష్టం చేశారు. ప్రతిపక్షాల గొంతు నొక్కేందుకు కేంద్రం పోలీసు వ్యవస్థను అడ్డుపెట్టుకుని దుర్వినియోగం చేస్తోందని ఆమె ఆరోపించారు. కాంగ్రెస్ మరియు ఇండియా కూటమి నేతల నిర్బంధంతో ఢిల్లీలోని జంతర్ మంతర్, ఎన్నికల సంఘం ప్రధాన కార్యాలయ పరిసర ప్రాంతాల్లో పెద్ద ఎత్తున భద్రతా బలగాలు మోహరించడంతో తీవ్ర ఉద్రిక్త పరిస్థితులు నెలకొన్నాయి.
