పశ్చిమాసియాలో యుద్ధ మేఘాలు మరోసారి తీవ్ర ఆందోళన రేకెత్తిస్తున్నాయి. సౌదీ అరేబియా రాజధాని రియాద్‌లోని కింగ్ ఖలీద్ అంతర్జాతీయ విమానాశ్రయాన్ని లక్ష్యంగా చేసుకుని ఇరాన్ మద్దతు కలిగిన యెమెన్ హౌతీ తిరుగుబాటుదారులు భారీ క్షిపణి దాడులకు పాల్పడటంతో తీవ్ర ఉద్రిక్త పరిస్థితులు ఏర్పడ్డాయి. ఈ పరిణామాల నేపథ్యంలో ప్రయాణికులు, విమాన సిబ్బంది భద్రతను అత్యంత ప్రాధాన్యతగా భావించిన భారత ప్రముఖ విమానయాన సంస్థలు ఎయిరిండియా, ఇండిగో కీలక నిర్ణయాలు తీసుకున్నాయి. భారత్ నుంచి రియాద్‌కు రాకపోకలు సాగించే పలు విమానాలను రద్దు చేయడంతో పాటు మరికొన్ని విమానాలను అత్యవసరంగా దారిమళ్లించాయి.
ఈ క్రమంలో ఢిల్లీ నుంచి రియాద్‌కు బయలుదేరిన ఎయిరిండియా విమానం (AI2243) భద్రతా కారణాల దృష్ట్యా మార్గమధ్యం నుంచే వెనక్కి తిరిగి ఢిల్లీ విమానాశ్రయానికి చేరుకోగా, ఆ సర్వీసును పూర్తిగా రద్దు చేశారు. గల్ఫ్ ప్రాంతంలో నెలకొన్న సున్నిత పరిస్థితుల దృష్ట్యా అక్టోబర్ 10 వరకు రియాద్‌కు రాకపోకలు సాగించే అన్ని విమాన సర్వీసులను తాత్కాలికంగా నిలిపివేస్తున్నట్లు ఎయిరిండియా మరియు ఎయిరిండియా ఎక్స్‌ప్రెస్ స్పష్టం చేశాయి. విమానాలు రద్దయిన ప్రయాణికులకు టికెట్ పూర్తి మొత్తాన్ని రీఫండ్ చేయడం లేదా ప్రత్యామ్నాయ ప్రయాణ ఏర్పాట్లను కల్పిస్తామని సంస్థ యాజమాన్యం వెల్లడించింది.
