బహిరంగ మార్కెట్‌లో ఆకాశాన్నంటుతున్న నిత్యావసరాలు, బియ్యం ధరలతో సతమతమవుతున్న సామాన్య, మధ్యతరగతి ప్రజలకు ఆంధ్రప్రదేశ్ ప్రభుత్వం భారీ ఊరట కల్పించింది. రైతు బజార్ల వేదికగా అత్యంత నాణ్యమైన సన్నబియ్యాన్ని సబ్సిడీ ధరకు అందించేందుకు కూటమి సర్కారు శ్రీకారం చుట్టింది. ఇందులో భాగంగా రాష్ట్రవ్యాప్తంగా ఉన్న అన్ని రైతు బజార్లలో కేఎన్ఎం (KNM), ఆర్ఎన్ఆర్ (RNR) రకాల సన్నబియ్యాన్ని కిలో కేవలం రూ. 50కే విక్రయించాలని నిర్ణయించింది.
ఇప్పటికే పలు రైతు బజార్లలో బీపీటీ (BPT) రకం బియ్యం కిలో రూ. 49కి అందుబాటులో ఉండగా, తాజాగా కేఎన్ఎం రకాన్ని సైతం సరసమైన ధరకే వినియోగదారులకు అందించేందుకు ఏర్పాట్లు చేశారు. ప్రస్తుతం బహిరంగ మార్కెట్‌లో నాణ్యమైన సన్నబియ్యం ధరలు కిలో రూ. 80 నుంచి రూ. 90 వరకు పలుకుతున్న నేపథ్యంలో, ప్రభుత్వ నిర్ణయం పేద, మధ్యతరగతి కుటుంబాలకు ఆర్థికంగా పెద్ద ఊరటనివ్వనుంది. ప్రతి కుటుంబానికి నెలకు సరిపడేలా ఒకేసారి 26 కిలోల ప్యాకింగ్‌తో ఈ సన్నబియ్యాన్ని పంపిణీ చేయనున్నారు.
ఈ ప్రత్యేక రాయితీ విక్రయాలను రాష్ట్ర పౌరసరఫరాల శాఖ మంత్రి నాదెండ్ల మనోహర్ విజయవాడలోని భవానీపురం రైతు బజార్‌లో లాంఛనంగా ప్రారంభించారు. ప్రజలకు ఎలాంటి ఇబ్బందులు లేకుండా బియ్యం అందించేందుకు రాష్ట్రవ్యాప్తంగా అన్ని రైతు బజార్లలో ప్రత్యేక కౌంటర్లు ఏర్పాటు చేసినట్లు అధికారులు స్పష్టం చేశారు. సామాన్య పౌరులు తమ సమీపంలోని రైతు బజార్లను సంప్రదించి నాణ్యమైన సన్నబియ్యాన్ని సద్వినియోగం చేసుకోవాలని ప్రభుత్వం సూచించింది.
