కమిషనరేట్ లోపల ఉండే గాడ్ ఫాదర్ అండతోనే రెచ్చిపోతునట్లు ఆరోపణలు..
హైదరాబాద్ – పాతబస్తీ సౌత్ వెస్ట్ జోన్ పరిధిలోని పోలీస్ స్టేషన్లో విధులు నిర్వహిస్తూ, విచ్చలవిడిగా అక్రమాలకు, అవినీతి దందాలకు పాల్పడుతున్న సీఐ భూ దందాలు, నిందితులను కేసు నుండి తప్పించడం, అక్రమాలకు పాల్పడుతున్న ముఠాల నుండి వసూళ్లు చేయడమే పనిగా పెట్టుకున్నాడని స్థానికుల నుండి ఆరోపణలు వెల్లువెత్తుతున్నాయి.ఇటీవల సీసీ కెమెరాలు ఏర్పాటు చేస్తానని, స్కూళ్లు, రెస్టారెంట్లు, బార్లు, షాపుల నుండి సదరు సీఐ దాదాపు రూ.20 లక్షలు వసూలు చేసినట్టు మాటలు వినవస్తున్నాయి.
ఇది ఇలా ఉండగా ఇటీవల ఒక పెళ్లి బరాత్లో, కత్తులు తిప్పుతూ హల్చల్ చేసిన యువకుల వీడియో వైరల్ అవ్వడంతో, వారిపై చర్యలు తీసుకోవాలని ఉన్నతాధికారులు ఆదేశించిన నేపథ్యంలో ఈ కేసులో అమాయకులను ఇరికించి, నిందితులను తప్పించేందుకు రూ.2.5 లక్షల లంచం తీసుకున్నట్లు ఆరోపణలు సైతం ఉన్నాయి.అర్ధరాత్రి వసూళ్లకు పాల్పడుతున్న ముఠాను స్టేషన్ కానిస్టేబుళ్లు అరెస్టు చేయగా, సీఐ సదరు కానిస్టేబుళ్లపై మండిపడుతూ ముఠాను ఎలాంటి కేసు లేకుండా వదిలిపెట్టాడని స్టేషన్ సిబ్బంది నుంచి గుసగుసలు వినిపిస్తున్నాయి.అయితే ఇదంతా కమిషనరేట్ లోపల ఉండే తన గాడ్ ఫాదర్ అండతోనే చేస్తున్నాడని చర్చించుకుంటున్న పోలీస్ వర్గాలు ఇలాంటి అవినీతి పోలీస్ అధికారిపై ఉన్నతాధికారులు వెంటనే చర్యలు తీసుకోవాలని స్థానికులు డిమాండ్ చేస్తున్నారు.
