కల్వకుంట్ల కవిత స్థాపించిన నూతన రాజకీయ పార్టీకి కేంద్ర ఎన్నికల సంఘం (ECI) ఎట్టకేలకు గ్రీన్ సిగ్నల్ ఇచ్చింది. తొలుత ‘తెలంగాణ రాష్ట్ర సేన’ అనే పేరును ప్రతిపాదించినప్పటికీ, సాంకేతిక కారణాల వల్ల ఎన్నికల సంఘం ‘తెలంగాణ రక్షణ సేన’ (TRS) అనే పేరును ఖరారు చేసింది. జనవరి 2026లో దరఖాస్తు చేసుకున్న ఐదు పేర్లలో ఈసీ దీనిని ఎంపిక చేయడంతో కవిత కొత్త రాజకీయ ప్రయాణానికి మార్గం సుగమమైంది.
పార్టీ పేరు ఖరారు కావడంపై కవిత సోషల్ మీడియాలో స్పందిస్తూ భావోద్వేగానికి లోనయ్యారు. “TRS అనే పేరు నాకు రాసిపెట్టి ఉందేమో” అంటూ ఆమె ఆసక్తికర వ్యాఖ్యలు చేశారు. తాము మూడవ ప్రాధాన్యతగా ఇచ్చిన పేరును ఎన్నికల సంఘం ఆమోదించడం కేవలం యాదృచ్ఛికమని, పాత పేరుతో ఉన్న అనుబంధం మళ్ళీ కొత్త రూపంలో రావడం పట్ల ఆమె సంతోషాన్ని వ్యక్తం చేశారు. గతంలో ఉన్న పార్టీ పేరుకు దగ్గరగా ఉండటం కార్యకర్తల్లో కొత్త ఉత్సాహాన్ని నింపుతుందని ఆమె అభిప్రాయపడ్డారు.
తెలంగాణ అస్తిత్వ పరిరక్షణే ధ్యేయంగా తన పార్టీ పనిచేస్తుందని కవిత స్పష్టం చేశారు. గత రెండు దశాబ్దాలుగా తెలంగాణ సాంస్కృతిక పునరుజ్జీవం కోసం తాను చేసిన కృషిని, ఇకపై రాజకీయ పార్టీ ద్వారా మరింత బలోపేతం చేస్తానని ఆమె హామీ ఇచ్చారు. అంకితభావంతో ప్రజల సమస్యల కోసం పోరాడుతూ, తెలంగాణ సమాజానికి అండగా ఉంటానని ఈ సందర్భంగా ఆమె వెల్లడించారు.
