కేంద్ర హోంశాఖ సహాయ మంత్రి బండి సంజయ్ కుమారుడు బండి భగీరథ్ తనపై నమోదైన పోక్సో కేసుకు సంబంధించి బుధవారం పోలీసుల విచారణకు హాజరుకాలేదు. వ్యక్తిగత కారణాల వల్ల తాను రాలేకపోతున్నానని, దర్యాప్తుకు సహకరించేందుకు మరో రెండు రోజుల సమయం కావాలని కోరుతూ పేట్బషీరాబాద్ పోలీసులకు ఈ-మెయిల్ ద్వారా లేఖ పంపారు. నోటీసులు తక్కువ సమయంలో అందాయని, తనపై వచ్చిన ఆరోపణలకు వ్యతిరేకంగా ఆధారాలు సేకరించుకోవాల్సి ఉందని ఆయన అందులో పేర్కొన్నారు.
మైనర్ బాలికపై లైంగిక దాడి ఆరోపణలతో నమోదైన ఈ కేసులో పోలీసులు ఇప్పటికే సెక్షన్ 5(1), 6 వంటి కఠినమైన పోక్సో నిబంధనలను ఎఫ్ఐఆర్లో చేర్చారు. ఈ ఆరోపణలు రుజువైతే 20 ఏళ్లకు పైగా జైలు శిక్ష పడే అవకాశం ఉంది. రాష్ట్ర ముఖ్యమంత్రి రేవంత్ రెడ్డి ఈ కేసును ప్రతిష్టాత్మకంగా తీసుకోవడంతో, డీసీపీ రితిరాజ్ పర్యవేక్షణలో పోలీసులు దర్యాప్తును అత్యంత వేగంగా కొనసాగిస్తున్నారు.
మరోవైపు, అరెస్ట్ భయంతో భగీరథ్ ముందస్తు బెయిల్ కోసం తెలంగాణ హైకోర్టును ఆశ్రయించారు. ఈ పిటిషన్పై గురువారం విచారణ జరగనుంది. అయితే, బాధితురాలి కుటుంబమే తనను తప్పుడు కేసులో ఇరికించి రూ. 5 కోట్లు డిమాండ్ చేసిందని భగీరథ్ ఇప్పటికే కరీంనగర్లో ఎదురు ఫిర్యాదు చేశారు. రాజకీయంగానూ ఈ కేసు పెను దుమారం రేపుతోంది. దీనిపై పూర్తి స్థాయి స్పష్టత రావాలంటే పోలీసుల తదుపరి చర్యల వరకు వేచి చూడాల్సిందే.
