ప్రముఖ నటుడు రాజీవ్ కనకాల చిక్కుకున్న స్కూల్ వివాదంపై నవ తెలంగాణ విద్యార్థి శక్తి (NTVS) స్పష్టత ఇచ్చింది. హైదరాబాద్లోని ‘వైబ్రాంట్’ అనే ప్రైవేట్ స్కూల్ ఈవెంట్కు రాజీవ్ ముఖ్య అతిథిగా హాజరుకాగా, పర్మిషన్ లేని స్కూల్ను ఆయన ప్రమోట్ చేస్తున్నారంటూ NTVS సభ్యులు అడ్డుకున్నారు. ఈ క్రమంలో అక్కడ వాగ్వాదం జరగడం ఉద్రిక్తతకు దారితీసింది. ప్రముఖ వ్యక్తులు ఇలాంటి సంస్థలను ప్రోత్సహిస్తే తల్లిదండ్రులు తప్పుదోవ పట్టే అవకాశం ఉందనే ఉద్దేశంతోనే ఆయన్ను ప్రశ్నించాల్సి వచ్చిందని NTVS అధ్యక్షుడు పవన్ వివరించారు.
ఈ వివాదంపై రాజీవ్ కనకాల ఇప్పటికే స్పందిస్తూ క్షమాపణలు చెప్పారు. కేవలం విద్యార్థులను అభినందించాలనే ఉద్దేశంతోనే తాను అక్కడికి వెళ్లానని, ఆ స్కూల్కు అనుమతులు ఉన్నాయో లేదో తనకు తెలియదని ఆయన క్లారిటీ ఇచ్చారు. స్కూల్ను ప్రమోట్ చేసే ఉద్దేశం తనకు లేదని, తన ఫోటోలు లేదా వీడియోలను ప్రమోషన్స్ కోసం వాడవద్దని యాజమాన్యానికి స్పష్టం చేసినట్లు ఆయన ఒక వీడియో సందేశాన్ని విడుదల చేశారు. అలాగే తల్లిదండ్రులు కూడా పిల్లలను చేర్పించే ముందు అన్ని విషయాలు విచారించుకోవాలని ఆయన సూచించారు.
రాజీవ్ కనకాల స్పందించిన తీరుపై NTVS హర్షం వ్యక్తం చేసింది. ఆయన అంత పాజిటివ్గా రియాక్ట్ అవుతారని తాము అనుకోలేదని, విద్యార్థుల భవిష్యత్తును దృష్టిలో ఉంచుకుని ఆయన ఇచ్చిన వివరణ ప్రశంసనీయమని పవన్ పేర్కొన్నారు. వాస్తవానికి ఆ స్కూల్లో సన్మానాలు పొందిన విద్యార్థులు వేర్వేరు పాఠశాలలకు చెందిన వారని, అక్కడ తప్పుడు సమాచారం ఇస్తున్నందుకే తాము అడ్డుకున్నామని ఆయన తెలిపారు. రాజీవ్ స్పందనకు ధన్యవాదాలు తెలుపుతూ ఈ వివాదానికి ముగింపు పలికారు.
