ప్రధానమంత్రి నరేంద్ర మోదీ తన ఐదు దేశాల అధికారిక పర్యటనలో భాగంగా ఇటలీ రాజధాని రోమ్కు చేరుకున్నారు. అక్కడ ఆయనకు ఇటలీ ప్రధాని జార్జియా మెలోని ఘన స్వాగతం పలికారు. రోమ్లో అడుగుపెట్టిన వెంటనే ప్రధాని మోదీ, జార్జియా మెలోనితో ప్రత్యేకంగా రాత్రి భోజన సమయంలో సమావేశమయ్యారు. ఈ సందర్భంగా ఇరు దేశాల ప్రధానులు చారిత్రాత్మక రోమన్ యాంఫిథియేటర్ అయిన ప్రసిద్ధ ‘కొలోస్సియం’ను రాత్రిపూట సందర్శించి, అక్కడ విహరిస్తూ పలు అంతర్జాతీయ అంశాలపై తమ అభిప్రాయాలను పంచుకున్నారు.
ఈ పర్యటనకు సంబంధించిన ఫోటోలు, వీడియోలను ప్రధాని మోదీ తన ‘X’ (గతంలో ట్విట్టర్) ఖాతా ద్వారా పంచుకున్నారు. రోమ్లో అడుగుపెట్టగానే ప్రధాని మెలోనిని కలవడం సంతోషంగా ఉందని, కొలోస్సియం సందర్శన అద్భుతంగా సాగిందని ఆయన పేర్కొన్నారు. భారత్-ఇటలీ దేశాల మధ్య స్నేహబంధాన్ని మరింత బలోపేతం చేసేందుకు మరియు పలు ద్వైపాక్షిక విషయాలను ముందుకు తీసుకెళ్లేందుకు ఇవాళ జరగబోయే అధికారిక చర్చల కోసం ఎదురుచూస్తున్నట్లు ప్రధాని మోదీ రాసుకొచ్చారు. మరోవైపు ఇటలీ ప్రధాని మెలోని సైతం కొలోస్సియం వద్ద దిగిన ఫోటోను షేర్ చేస్తూ.. “రోమ్కు స్వాగతం, మిత్రమా!” అంటూ ఆత్మీయంగా స్పందించారు.
భారత్, ఇటలీ దేశాల మధ్య దౌత్య, ఆర్థిక సంబంధాలు బలంగా పుంజుకుంటున్న తరుణంలో ప్రధాని మోదీ ఇటలీ పర్యటన అత్యంత ప్రాధాన్యత సంతరించుకుంది. రెండు దేశాలు వివిధ రంగాలలో సహకారాన్ని మరింత విస్తృతం చేసుకోవడానికి ‘జాయింట్ స్ట్రాటజిక్ యాక్షన్ ప్లాన్ 2025-2029’ను చురుకుగా ముందుకు తీసుకెళ్తున్నాయి. రక్షణ, భద్రత, స్వచ్ఛ ఇంధనం, సైన్స్ అండ్ టెక్నాలజీతో పాటు వాణిజ్యం మరియు పెట్టుబడుల రంగాల్లో బంధాన్ని బలోపేతం చేసుకోవడమే లక్ష్యంగా ఈ చర్చలు సాగుతున్నాయి. కాగా, ఈ ఐదు దేశాల పర్యటనలో భాగంగా ఇటలీ కంటే ముందు ప్రధాని మోదీ యూఏఈ, నెదర్లాండ్స్, స్వీడన్ మరియు నార్వే దేశాలలో పర్యటించారు.
