గ్లోబల్ స్టార్ రామ్ చరణ్ కథానాయకుడిగా, ‘ఉప్పెన’ ఫేమ్ బుచ్చిబాబు సానా దర్శకత్వంలో రూపుదిద్దుకుంటున్న భారీ రూరల్ స్పోర్ట్స్ యాక్షన్ డ్రామా ‘పెద్ది’ సరికొత్త అంతర్జాతీయ రికార్డును సొంతం చేసుకుంది. జూన్ 4న ప్రపంచవ్యాప్తంగా గ్రాండ్ రిలీజ్కు సిద్ధమవుతున్న ఈ చిత్రం, ఓవర్సీస్ మార్కెట్లో ముఖ్యంగా ఆస్ట్రేలియా ఖండంలో మునుపెన్నడూ లేని విధంగా అత్యంత భారీ స్థాయిలో విడుదల కానుంది. ఆస్ట్రేలియాలోని ప్రముఖ మరియు ప్రతిష్టాత్మక సినిమా చైన్ ‘హోయిట్స్’ (Hoyts)కు చెందిన అన్ని థియేటర్ లొకేషన్లలోనూ ప్రదర్శితం కానున్న మొట్టమొదటి భారతీయ చిత్రంగా ‘పెద్ది’ సరికొత్త చరిత్ర సృష్టించబోతోంది.
సాధారణంగా భారతీయ స్టార్ హీరోల పెద్ద సినిమాలు సైతం ఆస్ట్రేలియాలోని ఎంపిక చేసిన కొన్ని ప్రధాన హోయిట్స్ కేంద్రాలలో మాత్రమే విడుదలవుతుంటాయి. అయితే, ‘పెద్ది’ చిత్రంపై ఉన్న విపరీతమైన అంచనాల దృష్ట్యా, ప్రముఖ పంపిణీ సంస్థ ‘ప్రత్యంగిరా ఓవర్సీస్’ ఈ చిత్రాన్ని ఆస్ట్రేలియా, న్యూజిలాండ్, మరియు ఫిజీ దేశాల్లోని అన్ని హోయిట్స్ లొకేషన్లలో ఏకకాలంలో విడుదల చేసేందుకు పక్కా ప్రణాళికతో రంగం సిద్ధం చేసింది. హాలీవుడ్ చిత్రాల స్థాయిలో తెలుగు సినిమాకు అంతర్జాతీయ వేదికలపై ఇంతటి భారీ స్క్రీనింగ్ లభించడం గ్లోబల్ బాక్సాఫీస్ వద్ద మన సినిమాకు పెరుగుతున్న తిరుగులేని ఆదరణకు, రామ్ చరణ్ ఇంటర్నేషనల్ క్రేజ్కు నిదర్శనమని ట్రేడ్ వర్గాలు విశ్లేషిస్తున్నాయి.
ఈ భారీ చిత్రంలో రామ్ చరణ్ సరసన బాలీవుడ్ బ్యూటీ జాన్వీ కపూర్ కథానాయికగా నటిస్తుండగా, కన్నడ సూపర్ స్టార్ శివరాజ్కుమార్ ఒక అత్యంత కీలకమైన పాత్రలో కనిపించనున్నారు. ఆస్కార్ విజేత ఏఆర్ రెహమాన్ ఈ చిత్రానికి స్వరాలు అందిస్తుండటం విశేషం. టాలీవుడ్ ప్రముఖ నిర్మాణ సంస్థలైన మైత్రీ మూవీ మేకర్స్, సుకుమార్ రైటింగ్స్ సంయుక్తంగా అత్యంత ప్రతిష్టాత్మకంగా నిర్మిస్తున్న ఈ చిత్రం.. తాజా ఓవర్సీస్ రికార్డ్ ప్రకటనతో ప్రేక్షకులలో, ముఖ్యంగా గ్లోబల్ అభిమానులలో అంచనాలను ఆకాశానికి తీసుకెళ్లింది.
