ఉన్నత చదువుల కోసం కెనడా వెళ్లిన భారతీయ విద్యార్థిని విధి కల్పేష్భాయ్ మేఘా (22) అక్కడే కిరాతకంగా హత్యకు గురైంది. గుజరాత్లోని బోర్సాద్ ప్రాంతానికి చెందిన ఈ యువతి కెనడాలోని నయాగరా రీజియన్లో దారుణంగా నరికి చంపబడింది. ఈ మరణం వెనుక డ్రగ్స్ మరియు మనీ యాంగిల్ ఉన్నట్లు స్థానిక నివేదికలు స్పష్టం చేస్తున్నాయి. ఒక స్థానిక డ్రగ్ డీలర్ జరిపిన లూటీ యత్నాన్ని, బలవంతపు వసూళ్లను ఆమె ధైర్యంగా ఎదిరించడమే ఆమె ప్రాణాల మీదకు తెచ్చిందని బాధితురాలి తండ్రి కన్నీరుమున్నీరవుతూ మీడియానికి వెల్లడించారు.
ఈ ఘోర ఉదంతం మే 15వ తేదీన సెయింట్ కాథరిన్స్ ప్రాంతంలో జరిగింది. నిందితుడైన 40 ఏళ్ల జోషువా సెయింట్ ఒమర్ అనే స్థానిక డ్రగ్ డీలర్.. విధి మేఘా నుండి బలవంతంగా డబ్బులు వసూలు చేయడానికి ప్రయత్నించాడు. అయితే విధి అతనికి లొంగకుండా, డబ్బులు ఇవ్వడానికి నిరాకరిస్తూ ధైర్యంగా గొడవ పడింది. దీంతో తీవ్ర ఆగ్రహానికి లోనైన ఆ దుర్మార్గుడు కత్తితో విచక్షణారహితంగా దాడి చేసి ఆమెను హతమార్చాడు. గత నాలుగేళ్లుగా కెనడాలో ఉంటూ బిజినెస్ మేనేజ్మెంట్ పూర్తి చేసి, ప్రస్తుతం పర్సనల్ సపోర్ట్ వర్కర్ (పీఎస్డబ్ల్యూ) ఆనర్స్ కోర్సు చదువుతున్న విధి.. అంతలోనే ఇలా శవంగా మారడంతో ఆమె కుటుంబం పుట్టెడు దుఃఖంలో మునిగిపోయింది.
కాగా, హత్య జరిగిన మూడు రోజుల తర్వాత అంటే మే 18న కెనడా పోలీసులు నిందితుడు జోషువాను అరెస్ట్ చేసి, అతనిపై సెకండ్-డిగ్రీ మర్డర్ కేసు నమోదు చేశారు. ఈ లోగా తమ బిడ్డ మృతదేహాన్ని సంప్రదాయబద్ధంగా అంత్యక్రియలు నిర్వహించేందుకు చివరి చూపు కోసం భారతదేశానికి రప్పించాలని విధి తండ్రి కేంద్ర, రాష్ట్ర ప్రభుత్వాలను వేడుకుంటున్నారు. ఈ ఘటనపై స్పందించిన గుజరాత్ కేబినెట్ మంత్రి రమణ్భాయ్ సోలంకి.. బాధితురాలి కుటుంబాన్ని పరామర్శించి, విధి భౌతిక కాయాన్ని త్వరితగతిన భారత్కు తీసుకువచ్చేలా గుజరాత్ ముఖ్యమంత్రి కార్యాలయం (CMO) మరియు ప్రధాన మంత్రి కార్యాలయం (PMO) అధికారులతో మాట్లాడి అన్ని చర్యలు తీసుకుంటామని హామీ ఇచ్చారు.
