నటి, నిర్మాత సమంత రూత్ ప్రభు ప్రధాన పాత్రలో నటించిన సరికొత్త చిత్రం ‘మా ఇంటి బంగారం’ ప్రీ-రిలీజ్ వేడుక హైదరాబాద్లోని ఐటీసీ కోహినూర్లో ఘనంగా జరిగింది. ఈ కార్యక్రమానికి చిత్ర బృందంతో పాటు టాలీవుడ్కు చెందిన పలువురు సినీ ప్రముఖులు హాజరయ్యారు. ఈ సందర్భంగా సమంత మాట్లాడుతూ.. సినిమాలో సంప్రదాయ చీరకట్టులో ఉంటూనే, భారీ యాక్షన్ సన్నివేశాలు చేయడం తనకు ఎంతో సవాలుగాను, సరికొత్త అనుభవంగాను అనిపించిందని పేర్కొంటూ సినిమాపై ఆసక్తికర వ్యాఖ్యలు చేశారు.
ఈ చిత్రానికి ప్రముఖ దర్శకురాలు బి.వి. నందిని రెడ్డి దర్శకత్వం వహించారు. గతంలో వీరిద్దరి కాంబినేషన్లో వచ్చిన ‘ఓ బేబీ’ చిత్రం సూపర్ హిట్ కావడంతో, ఐదేళ్ల తర్వాత మళ్లీ వస్తున్న ఈ రెండో సినిమాపై ప్రేక్షకుల్లో, ట్రేడ్ వర్గాల్లో భారీ అంచనాలు నెలకొన్నాయి. నటిగానే కాకుండా నిర్మాతగానూ సమంతకు ఈ సినిమా ఎంతో ప్రత్యేకమైనది. ఆమె తన సొంత నిర్మాణ సంస్థ ‘ట్రలాలా మూవింగ్ పిక్చర్స్’ బ్యానర్పై ప్రముఖ నిర్మాతలు రాజ్ నిడిమోరు, హిమాంక్ దువ్వూరులతో కలిసి ఈ చిత్రాన్ని ప్రతిష్టాత్మకంగా నిర్మించారు.
ఈ సినిమాలో గుల్షన్ దేవయ్య, దిగంత్, సీనియర్ నటి గౌతమి, శ్రీలక్ష్మి, యాంకర్ శ్రీముఖి తదితరులు కీలక పాత్రలు పోషించారు. ఇప్పటికే విడుదలైన ట్రైలర్కు సోషల్ మీడియాలో విశేష స్పందన లభించగా, అడ్వాన్స్ బుకింగ్స్ కూడా జోరుగా సాగుతున్నాయి. జూన్ 18న ఎంపిక చేసిన కొన్ని ముఖ్య కేంద్రాల్లో ప్రీమియర్ షోలను ప్రదర్శించి, జూన్ 19న ఈ సినిమాను ప్రపంచవ్యాప్తంగా థియేటర్లలో భారీగా విడుదల చేయడానికి సన్నాహాలు చేస్తున్నారు.
