కావేరీ నదిపై కర్ణాటక ప్రభుత్వం ప్రతిపాదిస్తున్న మేకెదాటు డ్యామ్ నిర్మాణానికి వ్యతిరేకంగా తమిళనాడు అసెంబ్లీ శుక్రవారం ఒక కీలకమైన ఏకగ్రీవ తీర్మానాన్ని ఆమోదించింది. ముఖ్యమంత్రి సి. జోసెఫ్ విజయ్ సభలో ప్రవేశపెట్టిన ఈ తీర్మానానికి రాష్ట్రంలోని అన్ని రాజకీయ పార్టీలు ముక్తకంఠంతో మద్దతు తెలిపాయి. కావేరీ జలాల పంపిణీపై ఇప్పటికే స్పష్టమైన న్యాయపరమైన తీర్పులు ఉన్నాయని, ఈ తరుణంలో కర్ణాటక ఏకపక్షంగా ముందుకు సాగడం సరికాదని సీఎం ఈ సందర్భంగా పేర్కొన్నారు.
సుమారు రూ.9,000 కోట్ల భారీ వ్యయంతో కర్ణాటక తలపెట్టిన ఈ ప్రాజెక్ట్, కావేరీ జల వివాద ట్రైబ్యునల్ తో పాటు సుప్రీంకోర్టు తీర్పుల స్ఫూర్తికి పూర్తిగా విరుద్ధమని తమిళనాడు ప్రభుత్వం ఆరోపిస్తోంది. ఇప్పటికే అందుబాటులో ఉన్న నీటిని సంబంధిత రాష్ట్రాల మధ్య పూర్తిగా పంపిణీ చేసినందున, కొత్తగా ఎలాంటి నీటి నిల్వ ప్రాజెక్టుల నిర్మాణానికి ఆస్కారం లేదని తీర్మానంలో స్పష్టం చేశారు. ఈ ప్రాజెక్టుకు కేంద్ర ప్రభుత్వం ఎట్టిపరిస్థితుల్లోనూ అనుమతులు ఇవ్వకూడదని తమిళనాడు డిమాండ్ చేసింది.
మేకెదాటు డ్యామ్ గనుక నిర్మిస్తే దిగువ ప్రాంతాల్లో ఉన్న తమిళనాడు రైతులకు తీవ్ర నీటి కొరత ఏర్పడి, వారి ప్రయోజనాలు దెబ్బతినే ప్రమాదం ఉందని రాష్ట్ర ప్రభుత్వం ఆందోళన వ్యక్తం చేసింది. తమ రాష్ట్ర రైతుల హక్కులను, ప్రయోజనాలను కాపాడటం కోసం అన్ని స్థాయిలలోనూ చట్టపరమైన, రాజకీయ పోరాటాన్ని కొనసాగిస్తామని తమిళనాడు ప్రభుత్వం ఈ సందర్భంగా స్పష్టం చేసింది.
