యావత్ ప్రపంచాన్ని అతలాకుతలం చేసిన కరోనా మహమ్మారి పుట్టుకకు ప్రధాన కేంద్రంగా భావిస్తోన్న చైనాలోని ‘వుహాన్ ల్యాబ్’ పరిశోధనలపై అమెరికా జాతీయ నిఘా విభాగం (ఇంటెలిజెన్స్) డైరెక్టర్ తులసీ గబ్బార్డ్ సంచలన విషయాలను బయటపెట్టారు. తన పదవీకాలం చివరి రోజున గతంలో ఎన్నడూ రాని కొన్ని కీలక రహస్య పత్రాలను ఆమె డీక్లాసిఫై (బహిరంగం) చేశారు. మాజీ అధ్యక్షుడు జో బైడెన్కు ప్రధాన వైద్య సలహాదారుగా వ్యవహరించిన డాక్టర్ ఆంథోనీ ఫౌచీ, గబ్బిలాల్లోని కరోనా వైరస్లపై జరిగే ప్రమాదకరమైన ‘గెయిన్-ఆఫ్-ఫంక్షన్’ పరిశోధనల కోసం అమెరికా పన్ను చెల్లింపుదారుల సొమ్ము నుండి మిలియన్ల డాలర్లను వుహాన్ ల్యాబ్కు నిధులుగా సమకూర్చారని ఆమె తీవ్ర ఆరోపణలు గుప్పించారు.
విడుదలైన పత్రాల ప్రకారం.. కరోనా వైరస్ ల్యాబ్ నుండే లీక్ అయిందనే సిద్ధాంతాన్ని పూర్తిగా తొక్కిపెట్టడానికి, నిజాలను దాచడానికి డాక్టర్ ఫౌచీ రాజకీయ ప్రేరేపిత నాయకత్వంతో కలిసి తెరవెనుక చక్రం తిప్పినట్లు గబ్బార్డ్ కార్యాలయం స్పష్టం చేసింది. 2024లో అమెరికా కాంగ్రెస్ (పార్లమెంట్) ముందు ప్రమాణం చేసి మాట్లాడిన ఫౌచీ.. ఈ ప్రమాదకర పరిశోధనలపై ఇంటెలిజెన్స్ అధికారులతో జరిగిన చర్చలతో తనకు ఎలాంటి సంబంధం లేదని పచ్చి అబద్ధాలు చెప్పారని ఈ పత్రాలు బట్టబయలు చేస్తున్నాయి. తాను స్వయంగా ఎంపిక చేసుకున్న కొందరు శాస్త్రవేత్తల ద్వారా ఈ వైరస్ జంతువుల నుండే సహజంగా పుట్టిందనే నకిలీ నివేదికలను సృష్టించి, దాన్నే శాస్త్రీయ ఏకాభిప్రాయంగా ప్రపంచాన్ని నమ్మించారని ఆరోపించారు.
దాదాపు 38 ఏళ్ల పాటు నేషనల్ ఇన్స్టిట్యూట్ ఆఫ్ అలర్జీ అండ్ ఇన్ఫెక్షియస్ డిసీజెస్ (NIAID) అధినేతగా పనిచేసిన ఫౌచీ, పెద్ద పెద్ద ఫార్మా కంపెనీల ప్రయోజనాల కోసం ట్రిలియన్ డాలర్ల విలువైన సార్వత్రిక వ్యాక్సిన్ల పరిశోధనలకు కూడా నిధులు మళ్లించారని ఈ ప్రకటనలో పేర్కొన్నారు. సత్యాన్ని కప్పిపుచ్చడానికి ఫౌచీ ఉపయోగించిన ఎత్తుగడలు నేరుగా ‘డీప్ స్టేట్ ప్లేబుక్’ నుండి వచ్చినవేనని తులసీ గబ్బార్డ్ మండిపడ్డారు. కోవిడ్ మహమ్మారి కారణంగా ప్రపంచవ్యాప్తంగా కోట్ల మంది ప్రజలు అపారమైన కష్టాలు, బాధలు అనుభవించారని.. ఇన్నేళ్ల అబద్ధాలు, అణచివేతల తర్వాత అమెరికా ప్రజలకు ఇప్పుడు పూర్తి పారదర్శకత, నిజాలు, జవాబుదారీతనం తెలుసుకునే హక్కు ఉందని ఆమె స్పష్టం చేశారు.
