ఆల్ ఇండియా యునైటెడ్ డెమోక్రటిక్ ఫ్రంట్ (AIUDF) అధినేత, సీనియర్ నాయకుడు బద్రుద్దీన్ అజ్మల్ సుదీర్ఘ విరామం తర్వాత తిరిగి తన సొంత రాష్ట్ర రాజకీయాల్లోకి ఘనంగా రీఎంట్రీ ఇచ్చారు. అస్సాంలో ఇటీవల జరిగిన ఎన్నికల్లో బిన్నాకండి నియోజకవర్గం నుంచి ఎమ్మెల్యేగా విజయం సాధించిన ఆయన, సోమవారం స్పీకర్ రంజిత్ కుమార్ దాస్ సమక్షంలో శాసనసభ సభ్యుడిగా ప్రమాణ స్వీకారం చేశారు. గత మే నెలలో ప్రజాప్రతినిధుల ఉమ్మడి ప్రమాణ స్వీకార సమయానికి ఆయన పవిత్ర హజ్ యాత్రలో ఉండటంతో, తాజాగా స్పీకర్ ఛాంబర్లో ఈ ప్రక్రియను పూర్తి చేసి దాదాపు ఇరవై ఏళ్ల (20 ఏళ్లు) తర్వాత అస్సాం అసెంబ్లీలో మళ్లీ అడుగుపెట్టారు.
సుదీర్ఘ కాలం పాటు జాతీయ రాజకీయాల్లో, పార్లమెంట్లో చక్రం తిప్పిన అజ్మల్, తిరిగి రాష్ట్ర రాజకీయాల్లోకి రావడంపై అసెంబ్లీ ప్రాంగణంలో స్పష్టతనిచ్చారు. స్థానిక రాజకీయాల్లో చురుకైన పాత్ర పోషించాలనే ఉద్దేశంతో, పార్టీ హైకమాండ్ ఆదేశాల మేరకే తాను ఈసారి అసెంబ్లీ ఎన్నికల బరిలోకి దిగానని వెల్లడించారు. తనపై పూర్తి నమ్మకంతో భారీ మెజారిటీతో గెలిపించిన బిన్నాకండి నియోజకవర్గ ప్రజలకు ఆయన కృతజ్ఞతలు తెలిపారు. ఈ సందర్భంగా దేశంలో మారుతున్న రాజకీయ సమీకరణాలు, నిత్యావసర వస్తువుల ధరల పెరుగుదలపై ఆందోళన వ్యక్తం చేసిన ఆయన.. ద్రవ్యోల్బణాన్ని అదుపు చేయడంలో కేంద్ర, రాష్ట్ర ప్రభుత్వాలు పూర్తిగా విఫలమయ్యాయని మండిపడ్డారు.
పదవీ బాధ్యతలు చేపట్టిన తొలిరోజే అజ్మల్ రాష్ట్రంలోని అధికార బీజేపీ ప్రభుత్వంపై తీవ్రస్థాయిలో విరుచుకుపడ్డారు. ముఖ్యంగా అస్సాంలో ప్రభుత్వం ప్రస్తుతం చేపడుతున్న వివాదాస్పద అక్రమ ఆక్రమణల తొలగింపు మరియు కూల్చివేతల ధోరణిని ఆయన తీవ్రంగా ఖండించారు. ఎవరినైనా ఇళ్ల నుంచి ఖాళీ చేయించే ముందు అధికారులు సరైన నిజనిర్ధారణ చేయాలని, బాధితులకు ముందే పునరావాసం కల్పించాలని డిమాండ్ చేశారు. పేదలు, మైనారిటీల హక్కుల రక్షణ కోసం తమ పార్టీ అసెంబ్లీ లోపల, వెలుపల గళం విప్పుతుందని.. అవసరమైతే ఈ కూల్చివేతలపై దేశ అత్యున్నత న్యాయస్థానమైన సుప్రంకోర్టును ఆశ్రయించడానికి కూడా వెనకాడబోమని అజ్మల్ హెచ్చరించారు.
