ప్రముఖ దక్షిణాది నటి శ్రీలీల తన బిజీ సినీ కెరీర్తో పాటు వైద్య విద్యను (MBBS) ఎలా విజయవంతంగా కొనసాగించిందో వెల్లడించింది. ‘డాక్టర్స్ డే’ (Doctors’ Day) సందర్భంగా ఆమె ప్రత్యేకంగా మాట్లాడుతూ.. సినిమాల్లో ఎంత బిజీగా ఉన్నప్పటికీ చదువును ఎప్పుడూ నిర్లక్ష్యం చేయలేదని స్పష్టం చేసింది. తన కెరీర్లో మంచి గుర్తింపు తెచ్చిన ఒక పాట చిత్రీకరణ సమయంలోనూ ఎంబీబీఎస్ పరీక్షలకే మొదటి ప్రాధాన్యత ఇచ్చానని ఈ సందర్భంగా గుర్తు చేసుకుంది.
డాక్టర్ కావడం అనేది తన చిన్ననాటి కల అని, అదే తన జీవితంలో అతిపెద్ద అభిరుచి అని శ్రీలీల పేర్కొంది. ‘జూనియర్’ సినిమాలోని ‘వైరల్ వయ్యారి’ సాంగ్ షూటింగ్ జరుగుతున్న రోజుల్లోనే తనకు పరీక్షలు కూడా ఉన్నాయని తెలిపింది. ఆ క్లిష్ట సమయంలో షూటింగ్ పూర్తయిన వెంటనే ఏమాత్రం ఆలస్యం చేయకుండా ప్రాక్టికల్స్ రాయడానికి వెళ్లేదాన్నని, మళ్లీ అక్కడ విరామం దొరికినప్పుడు సెట్స్కు వచ్చి షూటింగ్లో పాల్గొనేదాన్నని వివరించింది. ఈ రెండు బాధ్యతలను ఒకేసారి నిర్వహించడం అంత సులభం కాకపోయినా, వైద్య విద్య తనకు ఎంతో విలువైనది కాబట్టి కష్టపడ్డానని చెప్పింది.
సాయి కొర్రపాటి నిర్మాణంలో, రాధా కృష్ణ రెడ్డి దర్శకత్వంలో కీరీటి రెడ్డి హీరోగా తెరకెక్కిన ‘జూనియర్’ చిత్రానికి దేవీ శ్రీ ప్రసాద్ సంగీతం అందించారు. ప్రస్తుతం శ్రీలీల పలు భాషల్లో క్రేజీ ప్రాజెక్టులతో దూసుకుపోతోంది. తెలుగులో పవన్ కళ్యాణ్ సరసన ‘ఉస్తాద్ భగత్ సింగ్’, తమిళంలో ‘పరాశక్తి’ చిత్రాలతో పాటు బాలీవుడ్ ప్రముఖ దర్శకుడు అనురాగ్ బసు దర్శకత్వంలో కార్తీక్ ఆర్యన్ సరసన ఒక హిందీ రొమాంటిక్ మ్యూజికల్ మూవీలో నటిస్తూ బిజీగా గడుపుతోంది.
