గ్రీస్ దేశం నుంచి జర్మనీకి ప్రయాణికులతో వెళ్తున్న ర్యాన్ఎయిర్ (Ryanair) కమర్షియల్ విమానంలో గగనతలంలో ఊహించని భయానక ప్రమాదం సంభవించింది. విమానం టేకాఫ్ అయిన కొద్దిసేపటికే దాని ఇంజిన్లో తీవ్ర సాంకేతిక లోపం తలెత్తి, ఒక భారీ భాగం ఒక్కసారిగా ఊడిపోయింది. అలా గాల్లో ఊడిపోయిన ఆ ఇంజిన్ ముక్క అత్యంత వేగంగా వచ్చి విమానం క్యాబిన్ విండోను బలంగా ఢీకొట్టడంతో కిటికీ గ్లాస్ మొత్తం ముక్కలైపోయింది.
ఆకాశంలో వేల అడుగుల ఎత్తులో విమానం కిటికీ పగలడంతో లోపల, వెలుపల పీడనంలో తీవ్ర వ్యత్యాసం ఏర్పడి క్యాబిన్ ప్రెజర్ ఒక్కసారిగా పడిపోయింది. ఈ వ్యాక్యూమ్ ప్రెజర్ మరియు గాలి ఒత్తిడి కారణంగా, ఆ కిటికీ పక్కనే కూర్చున్న 61 ఏళ్ల వృద్ధ ప్రయాణికుడు సీట్లో నుంచి కిటికీ గుండా సగం వరకు విమానం వెలుపలికి లాగబడ్డాడు. నడుము పైభాగం అంతా విమానం బయట గాల్లో వేలాడుతుండటంతో క్యాబిన్ మొత్తం ప్రయాణికుల అరుపులు, కేకలతో భీతావహంగా మారింది.
ప్రాణాలు గాల్లో కలిసిపోతాయనుకున్న ఆ అత్యంత క్లిష్ట సమయాల్లో తోటి ప్రయాణికులు, అతని భార్య అసాధారణ సమయస్ఫూర్తిని ప్రదర్శించారు. తీవ్రమైన గాలి వేగాన్ని సైతం లెక్కచేయకుండా ఆ వృద్ధుడి కాళ్లను, శరీరాన్ని గట్టిగా పట్టుకుని క్షణాల వ్యవధిలో విమానం లోపలికి లాగడంతో పెను ప్రమాదం తప్పింది. ఈ ఘర్షణలో సదరు వృద్ధుడి తల, భుజాలకు తీవ్ర గాయాలవగా.. పైలట్లు వెంటనే అప్రమత్తమై విమానాన్ని గ్రీస్లోని థెసలనికి విమానాశ్రయానికి మళ్లించి అత్యవసరంగా ల్యాండింగ్ చేశారు. రన్వేపై సిద్ధంగా ఉన్న అంబులెన్స్ ద్వారా బాధితుడిని ఆసుపత్రికి తరలించగా, ఈ భద్రతా లోపంపై విమానయాన అధికారులు ఉన్నత స్థాయి దర్యాప్తునకు ఆదేశించారు.
