దేశవ్యాప్తంగా తీవ్ర సంచలనం సృష్టించిన శ్రద్ధా వాకర్ హత్య కేసు మరోసారి వార్తల్లో నిలిచింది. ఘటన జరిగి ఏళ్లు గడుస్తున్నప్పటికీ తమ కుటుంబానికి ఇంకా పూర్తిస్థాయిలో న్యాయం జరగలేదని శ్రద్ధా వాకర్ కుటుంబ సభ్యులు ఆవేదన వ్యక్తం చేస్తున్నారు. ఈ నేపథ్యంలో శ్రద్ధా వాకర్ పినతల్లి రాజల్ నాయక్ చేసిన తాజా వ్యాఖ్యలు చర్చనీయాంశంగా మారాయి.
కేసు దర్యాప్తు, న్యాయం ఆలస్యంపై మీడియా ముందు మాట్లాడటం ప్రారంభించిన తర్వాత తనకు పాకిస్థాన్ నుంచి గుర్తుతెలియని ఫోన్ కాల్స్ వస్తున్నాయని రాజల్ నాయక్ ఆరోపించారు. మీడియాతో మాట్లాడినప్పటి నుంచి ఇలాంటి కాల్స్ రావడం తనను తీవ్ర ఆందోళనకు గురిచేస్తోందని ఆమె వెల్లడించారు. ఈ విషయాన్ని సంబంధిత అధికారుల దృష్టికి తీసుకెళ్లినట్లు తెలిపారు.
శ్రద్ధా వాకర్ హత్య కేసులో న్యాయ ప్రక్రియ వేగంగా పూర్తవ్వాలని కుటుంబ సభ్యులు కోరుతున్నారు. మరోవైపు, పాకిస్థాన్ నుంచి వచ్చినట్లు చెబుతున్న గుర్తుతెలియని కాల్స్ వెనుక ఎవరు ఉన్నారనే అంశంపై స్పష్టత రావాల్సి ఉంది. ఈ ఆరోపణలపై అధికారిక దర్యాప్తు జరిగితేనే కాల్స్కు సంబంధించిన వాస్తవాలు వెలుగులోకి వచ్చే అవకాశం ఉంది.
