భవిష్యత్తులో చంద్రుడు, అంగారకుడిపై మానవులు నివసించేందుకు వీలుగా భారత వ్యోమగామి, గ్రూప్ కెప్టెన్ శుభాంశు శుక్లా వినూత్న ఆలోచనను ప్రతిపాదించారు. ‘భారతీయ హ్యాబిటబుల్‌ ఎక్స్‌పాండబుల్‌ ఎక్స్‌ట్రాటెర్రెస్ట్రియల్‌ హ్యాబిటాట్‌’ పేరుతో రూపొందించిన ఈ కాన్సెప్ట్‌.. ఇతర గ్రహాలపై మానవ నివాసాలకు ఉపయోగపడేలా రూపొందించబడింది.
రష్యాలో తన వ్యోమగామి శిక్షణను పూర్తి చేసుకుని భారత్‌కు తిరిగి వచ్చిన అనంతరం శుభాంశు శుక్లా బెంగళూరులోని ఇండియన్ ఇన్‌స్టిట్యూట్ ఆఫ్ సైన్స్ (IISc)లో ఈ అంశంపై పరిశోధన చేపట్టారు. అంతరిక్షంలో మానవులు దీర్ఘకాలం నివసించేందుకు అవసరమైన సౌకర్యాలు, రక్షణ వ్యవస్థలపై ఈ పరిశోధనలో ప్రధానంగా దృష్టి సారించారు.
అంతరిక్షంలో ఉండే తీవ్రమైన రేడియేషన్, విపరీతమైన ఉష్ణోగ్రతల నుంచి వ్యోమగాములను రక్షించే సురక్షిత ఆశ్రయంగా ఈ హ్యాబిటాట్‌ను డిజైన్ చేశారు. భవిష్యత్తులో చంద్రుడు, అంగారకుడిపై మానవ మిషన్లు నిర్వహించే సమయంలో ఇలాంటి నివాస వ్యవస్థలు కీలకంగా మారే అవకాశం ఉంది. శుభాంశు శుక్లా ప్రతిపాదించిన ఈ ఆలోచన అంతరిక్ష పరిశోధనలో భారత్‌ భవిష్యత్‌ ప్రణాళికలకు మరింత ప్రాధాన్యతను తీసుకురానుంది.
