జర్మనీకి చెందిన ప్రముఖ కార్ల తయారీ సంస్థ వోక్స్‌వ్యాగన్‌ ఊహించని సంచలన నిర్ణయం తీసుకుంది. ఈ దశాబ్దం ముగిసేలోగా కంపెనీలో ఏకంగా లక్ష ఉద్యోగాలను తగ్గించేందుకు యాజమాన్యం, కార్మిక సంఘాలు ఒప్పందానికి వచ్చినట్లు సమాచారం. కార్పొరేట్‌ చరిత్రలోనే ఇంత భారీ స్థాయిలో ఉద్యోగాల కోతకు సిద్ధం కావడం తీవ్ర చర్చనీయాంశంగా మారింది.
ఇప్పటికే కంపెనీలో 50 వేల ఉద్యోగాల కోతకు అంగీకారం కుదిరినట్లు తెలుస్తోంది. తాజాగా మరో 50 వేల పోస్టులను తగ్గించాలని నిర్ణయించడంతో మొత్తం ఉద్యోగాల కోత సంఖ్య లక్షకు చేరనుంది. ప్రపంచ ఆటోమొబైల్‌ రంగంలో వేగంగా మారుతున్న పరిస్థితులు, పెరుగుతున్న పోటీ, కంపెనీ వ్యయాలను తగ్గించుకోవాల్సిన అవసరం వంటి అంశాలు ఈ నిర్ణయానికి కారణమని తెలుస్తోంది.
వోక్స్‌వ్యాగన్‌ తీసుకున్న ఈ నిర్ణయం ఉద్యోగులు, ఆటోమొబైల్‌ పరిశ్రమ వర్గాల్లో ఆందోళనకు కారణమవుతోంది. భారీ స్థాయిలో ఉద్యోగాలు తగ్గించడం వల్ల కంపెనీ కార్యకలాపాలు, ఉత్పత్తి వ్యవస్థపై ఎలాంటి ప్రభావం పడుతుందనే అంశంపై ఆసక్తి నెలకొంది. ప్రపంచవ్యాప్తంగా ఆటోమొబైల్‌ రంగం మారుతున్న సమయంలో వోక్స్‌వ్యాగన్‌ తీసుకున్న ఈ నిర్ణయం పరిశ్రమ భవిష్యత్తుపై మరోసారి చర్చకు దారితీసింది.
