ఆంధ్రప్రదేశ్ రాజకీయాల్లో కలకలం రేపుతున్న మాజీ మంత్రి, వైఎస్సార్‌సీపీ నేత జోగి రమేశ్ కుటుంబ వివాదం రాజ్‌భవన్‌కు చేరింది. జోగి రమేశ్ కోడలు మేఘన విజయవాడలోని రాజ్‌భవన్‌లో రాష్ట్ర గవర్నర్ అబ్దుల్ నజీర్‌ను కలిసి తనకు ప్రాణహాని ఉందని, తక్షణ రక్షణ కల్పించాలని విజ్ఞప్తి చేశారు. తన భర్త, అత్తమామలతో పాటు కుటుంబ సభ్యులు అదనపు కట్నం కోసం వేధిస్తూ తనపై హత్యాయత్నానికి పాల్పడ్డారని ఆమె గవర్నర్‌కు ఫిర్యాదు చేయడం తీవ్ర చర్చనీయాంశమైంది.
గోవా పర్యటనలో పడవ నుంచి నీటిలోకి నెట్టి చంపేందుకు ప్రయత్నించారని, పెళ్లి సమయంలో రూ. 5 కోట్లు ఖర్చు చేసినా మరో రూ. 5 కోట్లు, కార్లు, ఆభరణాలు తేవాలంటూ తీవ్రంగా వేధించారని మేఘన తన ఫిర్యాదులో పేర్కొన్నారు. ఈ ఏడాది జులైలో ఇబ్రహీంపట్నం పోలీస్ స్టేషన్‌లో జోగి రమేశ్ సహా 11 మంది కుటుంబ సభ్యులపై వరకట్న వేధింపులు, గృహ హింస, హత్యాయత్నం కింద ఇప్పటికే కేసులు నమోదయ్యాయి. బాధితురాలి వాదనలు విన్న గవర్నర్, ఈ కేసుకు సంబంధించి తగిన సూచనలు చేసినట్లు సమాచారం.
మరోవైపు, తన కోడలు చేస్తున్న ఆరోపణలను జోగి రమేశ్ కుటుంబ సభ్యులు పూర్తిగా ఖండించారు. ఇది కేవలం కుటుంబానికి సంబంధించిన వ్యక్తిగత విషయమని, దీనికి కావాలనే రాజకీయ రంగు పులుముతున్నారని వారు వాదిస్తున్నారు. ఈ కేసుకు సంబంధించి ఇప్పటికే కొందరు నిందితులు ముందస్తు బెయిల్ పొందగా, ఇరువర్గాల మధ్య నెలకొన్న ఈ వివాదం ప్రస్తుతం రాజకీయ వర్గాల్లో హాట్‌ టాపిక్‌గా మారింది.
