ఆంధ్రప్రదేశ్ ప్రభుత్వ ఉద్యోగులు, పింఛనుదారులకు కూటమి ప్రభుత్వం దసరా పండుగ వేళ తీపికబురు అందించింది. దీర్ఘకాలంగా పెండింగ్‌లో ఉన్న రెండు విడతల కరవు భత్యాన్ని (DA) విడుదల చేస్తూ రాష్ట్ర ఆర్థిక శాఖ అధికారికంగా ఉత్తర్వులు జారీ చేసింది. పెంచిన డీఏలను ప్రస్తుత సెప్టెంబరు నెల జీతంతో కలిపి అక్టోబరు 1న చెల్లించాలని ఆదేశించింది. ప్రభుత్వం తీసుకున్న ఈ నిర్ణయంతో రాష్ట్రవ్యాప్తంగా ఉన్న లక్షలాది మంది ఉద్యోగులు, ఉపాధ్యాయులు, పెన్షనర్లకు ఆర్థికంగా భారీ ఊరట లభించనుంది.
ఉత్తర్వుల ప్రకారం.. 2024 జులై 1వ తేదీ నుంచి 2.73 శాతం డీఏను అమలు చేయనున్నారు. దీనికి సంబంధించిన 26 నెలల బకాయిలను (Arrears) 2027 సంవత్సరంలో ఏప్రిల్, జూన్, ఆగస్టు, అక్టోబరు నెలల్లో నాలుగు సమాన విడతల్లో ఉద్యోగుల ఖాతాల్లో జమ చేయనున్నారు. అలాగే 2025 జనవరి 1 నుంచి మరో 1.82 శాతం డీఏను అమలు చేయనుండగా, దీనికి సంబంధించిన 20 నెలల బకాయిలను 2028 సంవత్సరంలో జనవరి, మార్చి, మే, జులై నెలల్లో నాలుగు విడతల్లో చెల్లించేలా షెడ్యూల్ ఖరారు చేశారు.
రాష్ట్రంలోని పింఛనుదారులకు కూడా ఉద్యోగుల తరహాలోనే ఇదే ప్రాతిపదికన బకాయిలు చెల్లించాలని ఆర్థిక శాఖ ప్రత్యేక ప్రధాన కార్యదర్శి పియూష్ కుమార్ స్పష్టమైన ఆదేశాలు ఇచ్చారు. నగదు రూపంలో పెరిగిన డీఏ సెప్టెంబరు వేతనంతోనే నేరుగా అందనుండటంతో ఉద్యోగ సంఘాలు హర్షం వ్యక్తం చేస్తున్నాయి. రాష్ట్ర ఆర్థిక పరిస్థితి క్లిష్టంగా ఉన్నప్పటికీ ఉద్యోగుల సంక్షేమాన్ని దృష్టిలో ఉంచుకుని డీఏ విడుదలకు ఆమోదం తెలిపినందుకు ప్రభుత్వానికి కృతజ్ఞతలు తెలియజేశాయి.
