తెలంగాణ రాజకీయాల్లో అనూహ్య పరిణామాల మధ్య మాజీ మంత్రి కొండా సురేఖ చేసిన వ్యాఖ్యలు తీవ్ర దుమారాన్ని రేపుతున్నాయి. మంత్రివర్గం నుంచి తనను బర్తరఫ్ చేయడంపై ఎలాంటి బాధ లేదని, కానీ ఏ తప్పిదం లేకుండానే ఉన్నపళంగా తొలగించారన్న ఆవేదన మాత్రం తనలో మిగిలిపోయిందని ఆమె స్పష్టం చేశారు. తన సుదీర్ఘ రాజకీయ ప్రస్థానంలో పదవులు కేవలం అలంకారం మాత్రమేనని వ్యాఖ్యానించిన సురేఖ, తన హయాంలో మూడు శాఖలను అవినీతి మరక అంటకుండా అత్యంత పారదర్శకంగా నడిపించానని తెలిపారు. మంత్రి పదవి పోయినప్పటికీ చివరి శ్వాస వరకు కాంగ్రెస్ పార్టీలోనే కొనసాగుతానని, పార్టీని వీడే ఆలోచనే లేదని ఆమె కుండబద్దలు కొట్టారు.
అదే సమయంలో నిర్వహించిన అనుచరుల సమావేశంలో కొండా మురళి చేసిన వ్యాఖ్యలు రాజకీయ వర్గాల్లో మరింత ఆసక్తిని రేకెత్తించాయి. తమ రాజకీయ ప్రయాణంలో తన ఆలోచనలు, సురేఖ అభిప్రాయాలు ఎప్పుడూ ఒకే మార్గంలో సాగుతాయని, ఇందులో ఎలాంటి మార్పు ఉండబోదని ఆయన స్పష్టం చేశారు. ఒకవేళ పార్టీ పెద్దలకు క్షమాపణ చెప్పి ఉంటే మంత్రి పదవి దక్కేదేమోనని పరోక్షంగా ప్రస్తావిస్తూనే, తమ ఆత్మగౌరవాన్ని తాకట్టు పెట్టే ప్రసక్తే లేదన్న సంకేతాలు ఇచ్చారు.
అయితే ఇదే సమావేశంలో తమ కుమార్తె రాజకీయ భవిష్యత్తుపై మురళి చేసిన వ్యాఖ్యలు సరికొత్త చర్చకు దారితీశాయి. తమ ఆలోచనా విధానంతో సంబంధం లేకుండా తమ కుమార్తె భవిష్యత్ రాజకీయ బాట పూర్తిగా భిన్నంగా ఉండబోతోందని ఆయన తేల్చిచెప్పారు. అనుచరుల వేదికపైనే కుటుంబంలోని భిన్న రాజకీయ గళాలను బహిర్గతం చేయడంతో, రాబోయే రోజుల్లో కొండా కుటుంబం ఎలాంటి సరికొత్త రాజకీయ వ్యూహాలతో ముందుకెళ్తుందోనన్న తీవ్ర ఉత్కంఠ కార్యకర్తల్లో నెలకొంది.
