ప్రముఖ కవి, జాతీయ పురస్కార గ్రహీత, సినీ గేయ రచయిత సుద్దాల అశోక్ తేజకు మరో ప్రతిష్టాత్మక గౌరవం దక్కనుంది. ఆయనను ‘తెలంగాణ తెలుగు తేజం సాహిత్య పురస్కారం-2026’కు ఎంపిక చేసినట్లు అవార్డు కమిటీ అధికారికంగా ప్రకటించింది. తెలుగు భాషా సంరక్షణ సంఘం మరియు తెలంగాణ సాహితీ సంస్థ సంయుక్త ఆధ్వర్యంలో ఏటా ప్రదానం చేసే ప్రతిష్టాత్మక బుర్ర నర్సమ్మ-లింగారెడ్డి స్మారక రాష్ట్ర స్థాయి పురస్కారానికి ఈసారి ఆయనను ఎంపిక చేశారు. తెలుగు భాష, సాహిత్య వికాసానికి ఆయన అందించిన విశేష సేవలను గుర్తిస్తూ ఈ అవార్డుకు ఎంపిక చేసినట్లు నిర్వాహకులు వెల్లడించారు.
ఈ పురస్కార ప్రదానోత్సవ కార్యక్రమాన్ని కరీంనగర్ వేదికగా ఘనంగా నిర్వహించనున్నారు. ఈ నెల 22వ తేదీన కరీంనగర్‌లో జరిగే ప్రత్యేక సభలో ప్రముఖ సాహితీవేత్తలు, కళాకారులు, ప్రముఖుల సమక్షంలో సుద్దాల అశోక్ తేజకు ఈ అవార్డును ప్రదానం చేయనున్నారు. తెలుగు చలనచిత్ర రంగానికి ఎన్నో అద్భుతమైన పాటలను అందించడంతో పాటు, తన రచనల ద్వారా తెలంగాణ నేలతల్లి గొప్పతనాన్ని, సామాజిక చైతన్యాన్ని చాటిచెప్పిన ఆయనకు ఈ పురస్కారం దక్కడం పట్ల సాహితీ అభిమానులు హర్షం వ్యక్తం చేస్తున్నారు.
తెలుగు భాష పరిరక్షణకు, తెలంగాణ ప్రాచీన, ఆధునిక సాహితీ వారసత్వాన్ని భావితరాలకు అందించేందుకు విశేష కృషి చేస్తున్న మట్టిబిడ్డలను గౌరవించడమే ఈ పురస్కారం ప్రధాన లక్ష్యమని నిర్వాహక వర్గాలు తెలిపాయి. భాషాభివృద్ధికి నిరంతరం పాటుపడుతున్న సాహితీకారులను ప్రోత్సహించే ఉద్దేశంతోనే ఏటా ఈ అవార్డులను అందజేస్తున్నామని స్పష్టం చేశారు. సుద్దాల అశోక్ తేజకు ఈ పురస్కారం ప్రకటించడంపై పలువురు సినీ, రాజకీయ, సాహిత్య రంగ ప్రముఖులు ఆయనకు శుభాకాంక్షలు తెలుపుతున్నారు.
