కలియుగ ప్రత్యక్ష దైవమైన తిరుమల శ్రీ వేంకటేశ్వరస్వామి వారి వార్షిక సాలకట్ల బ్రహ్మోత్సవాలు మంగళవారం సాయంత్రం శాస్త్రోక్తంగా ధ్వజారోహణ ఘట్టంతో ప్రారంభమయ్యాయి. శ్రీదేవి, భూదేవి సమేత శ్రీ మలయప్పస్వామి వారి సమక్షంలో, వేద పండితుల మంత్రోచ్ఛారణలు మరియు మంగళవాయిద్యాల నడుమ ఆలయ అర్చకులు బంగారు ధ్వజస్తంభంపైకి గరుడ ధ్వజాన్ని ఎగురవేశారు. సమస్త దేవతలను, అష్టదిక్పాలకులను ఈ దివ్య మహోత్సవాలకు ఆహ్వానించే ఈ పవిత్ర కార్యక్రమంలో భక్తులు భారీ సంఖ్యలో పాల్గొనడంతో సప్తగిరులు గోవింద నామస్మరణతో మార్మోగాయి.
బ్రహ్మోత్సవాల ప్రారంభ వేళ ఆంధ్రప్రదేశ్ ప్రభుత్వం తరఫున శ్రీవారికి పట్టువస్త్రాలు సమర్పించేందుకు ముఖ్యమంత్రి నారా చంద్రబాబు నాయుడు కుటుంబ సమేతంగా తిరుమలకు విచ్చేశారు. ఆయన వెంట సతీమణి నారా భువనేశ్వరి, కుమారుడు రాష్ట్ర మంత్రి నారా లోకేశ్, కోడలు నారా బ్రహ్మణి ఉన్నారు. సంప్రదాయ వస్త్రధారణలో స్వామివారి సన్నిధికి చేరుకున్న సీఎం చంద్రబాబు కుటుంబ సభ్యులు, ముందుగా బేడి ఆంజనేయస్వామి ఆలయంలో ప్రత్యేక పూజలు నిర్వహించారు.
అనంతరం పవిత్ర పట్టువస్త్రాలను తలపై ధరించి, మంగళవాయిద్యాల నడుమ మేళతాళాలతో ఊరేగింపుగా ఆలయంలోకి ప్రవేశించిన సీఎం చంద్రబాబు, నిర్ణీత ముహూర్తంలో ప్రభుత్వం తరఫున స్వామివారికి పట్టువస్త్రాలను సమర్పించి మూలవిరాట్‌ను దర్శించుకున్నారు. దర్శనానంతరం రంగనాయకుల మండపంలో వేద పండితులు ముఖ్యమంత్రి కుటుంబానికి వేదాశీర్వచనం అందించి శేషవస్త్రం, తీర్థప్రసాదాలు అందజేశారు. ఈ వేడుకలో టీటీడీ చైర్మన్ బీఆర్ నాయుడు, దేవాదాయ శాఖ మంత్రి ఆనం రామనారాయణరెడ్డి, పలువురు అధికారులు, ప్రముఖ సంగీత దర్శకుడు తమన్ పాల్గొన్నారు.
