తెలుగు రాష్ట్రాల్లో సంచలనం రేపిన జానపద కళాకారులు ఈశ్వర్ సాయి, సింగర్ మాధురి రాథోడ్ వివాదం మరో తీవ్ర విషాదకర మలుపు తిరిగింది. పెళ్లి చేసుకుంటానని నమ్మించి మోసం చేశారంటూ మాధురి రాథోడ్ గతంలో పోలీసులను ఆశ్రయించడంతో ఈ వివాదం బహిర్గతమై చర్చనీయాంశంగా మారింది. ఈ గొడవలు తారస్థాయికి చేరిన నేపథ్యంలో, తీవ్ర మనస్తాపానికి గురైన ఈశ్వర్ సాయి భార్య శరణ్య బలవన్మరణానికి యత్నించడం ఇరు కుటుంబాల్లోనూ, స్థానికంగానూ తీవ్ర కలకలం సృష్టించింది.
ఆత్మహత్యాయత్నానికి ముందు శరణ్య విడుదల చేసిన ఆవేదనభరిత ఆడియో సందేశం ప్రస్తుతం సామాజిక మాధ్యమాల్లో వైరల్‌గా మారింది. ఈ పోరాటంలో తాను తీవ్రంగా మోసపోయానని, తన జీవితాన్ని పూర్తిగా ఆగమాగం చేశారని ఆ ఆడియోలో ఆమె కన్నీటిపర్యంతమయ్యారు. “ఈశ్వర్ లేని జీవితాన్ని నేను ఊహించుకోలేను, ఆయన లేకపోతే నేను బతకలేను.. అందుకే ఈ అఘాయిత్యానికి పాల్పడుతున్నాను” అని పేర్కొంటూనే, తన కుమారుడిని అందరూ కలిసి జాగ్రత్తగా చూసుకోవాలని వేడుకోవడం ప్రతీ ఒక్కరినీ కలచివేసింది.
శరణ్య ఆత్మహత్యాయత్నం చేసిన విషయాన్ని గమనించిన కుటుంబ సభ్యులు ఆమెను వెంటనే స్థానిక ఆసుపత్రికి తరలించారు. ప్రస్తుతం వైద్యులు ఆమెకు అత్యవసర విభాగంలో చికిత్స అందిస్తున్నారని, ఆమె ఆరోగ్య పరిస్థితి అత్యంత విషమంగా ఉందని సమాచారం. కళాకారుల వ్యక్తిగత కలహాలు ఒక నిండు ప్రాణం మీదికి రావడంతో ఈ ఘటనపై పోలీసులు కేసు నమోదు చేసుకుని దర్యాప్తును వేగవంతం చేశారు.
