ఉమ్మడి పాలమూరు (మహబూబ్‌నగర్) జిల్లాలో నెలకొన్న తీవ్ర సాగునీటి ఎద్దడిపై తెలంగాణ ముఖ్యమంత్రి రేవంత్ రెడ్డి స్వయంగా రంగంలోకి దిగారు. జిల్లాలో వర్షాభావ పరిస్థితుల కారణంగా పొట్ట దశకు వచ్చిన పంటలు ఎండిపోయే ప్రమాదం ఏర్పడటంతో అన్నదాతలను ఆదుకునేందుకు కర్ణాటక ప్రభుత్వంతో సంప్రదింపులు జరిపారు. ఇందులో భాగంగా కర్ణాటక ఉప ముఖ్యమంత్రి, జలవనరుల శాఖ మంత్రి డీకే శివకుమార్‌తో ఫోన్‌లో మాట్లాడిన సీఎం రేవంత్ రెడ్డి.. రైతుల కష్టాలను పరిగణనలోకి తీసుకుని జూరాల ప్రాజెక్టు పరిధిలోని పంటలను రక్షించేందుకు తక్షణమే 5 టీఎంసీల నీటిని విడుదల చేయాలని విజ్ఞప్తి చేశారు. ముఖ్యమంత్రి విజ్ఞప్తిపై కర్ణాటక ప్రభుత్వం కూడా సానుకూలంగా స్పందించినట్లు సమాచారం.
సాగునీటి విడుదల ప్రక్రియను వేగవంతం చేసేందుకు సీఎం ఆదేశాల మేరకు తెలంగాణ మంత్రులు, ప్రజాప్రతినిధుల బృందం ప్రత్యేకంగా రంగంలోకి దిగింది. రాష్ట్ర మంత్రులు జూపల్లి కృష్ణారావు, ఎన్. శ్రీహరిలతో పాటు ఎమ్మెల్యేలు బండ్ల కృష్ణమోహన్‌రెడ్డి, మేఘా రెడ్డి, జి. మధుసూదన్‌రెడ్డి తదితరులు తొలుత ముఖ్యమంత్రి రేవంత్ రెడ్డి, నీటిపారుదల శాఖ మంత్రి ఉత్తమ్ కుమార్ రెడ్డిలతో భేటీ అయ్యారు. కర్ణాటక ప్రభుత్వంతో చర్చించాల్సిన అంశాలపై పూర్తిస్థాయిలో సమాలోచనలు జరిపిన అనంతరం, ఈ ఉన్నత స్థాయి బృందం అధికారిక చర్చల కోసం నేరుగా బెంగళూరుకు పయనమై వెళ్లింది.
జూరాల ఆయకట్టుకు వెంటనే సాగునీరు విడుదల చేయాలని డిమాండ్ చేస్తూ స్థానిక రైతులు కొన్ని రోజులుగా పెద్ద ఎత్తున నిరసనలు తెలుపుతుండగా, ప్రతిపక్షాలైన బీఆర్‌ఎస్, బీజేపీలు సైతం రైతులకు మద్దతుగా ఆందోళనలను ఉధృతం చేయడంతో ఈ అంశం తీవ్ర రాజకీయ ప్రాధాన్యతను సంతరించుకుంది. ఈ క్రమంలో బెంగళూరు వెళ్లిన మంత్రుల బృందం కర్ణాటక ప్రభుత్వంతో చర్చలు జరిపి, ఆల్మట్టి లేదా నారాయణపూర్ రిజర్వాయర్ల నుంచి విడతలవారీగానైనా నీటిని విడుదల చేయించేలా ఒప్పందం కుదుర్చుకునేందుకు ప్రయత్నాలు ముమ్మరం చేస్తోంది.
