ఈ కొత్త విధానం వల్ల వ్యాపార నిర్వహణ ఖర్చులు గణనీయంగా పెరిగి, చివరకు ఆ భారం వస్తు, సేవల ధరల రూపంలో వినియోగదారులపైనే పడుతుందని వ్యాపార వర్గాలు ఆందోళన వ్యక్తం చేస్తున్నాయి. డిజిటల్ లావాదేవీలను ప్రోత్సహించాల్సిన తరుణంలో ఇలాంటి చార్జీలు విధించడం సరికాదని, తక్షణమే ఈ నిర్ణయాన్ని పునఃపరిశీలించాలని డిమాండ్ చేశారు. మరోవైపు సోషల్ మీడియాలో ప్రచారం జరిగినట్లుగా పెట్రోల్ బంకుల్లో ‘నో యూపీఐ డే’ నిరసనలు జరగలేదని, అదంతా నిరాధారమైన సమాచారమని ఇండియన్ ఆయిల్ కార్పొరేషన్ స్పష్టమైన ప్రకటన విడుదల చేసింది.
అయితే కేంద్ర ఆర్థిక మంత్రిత్వ శాఖ వివరాల ప్రకారం.. ఈ ప్రతిపాదిత నిబంధన సాధారణ ప్రజలపై ఎలాంటి భారం మోపదు. వ్యక్తి నుంచి వ్యక్తికి (P2P) జరిగే లావాదేవీలు పూర్తిగా ఉచితంగానే కొనసాగుతాయి. రూ. 2,000 వరకు చేసే సాధారణ మర్చంట్ చెల్లింపులకు, చిన్న వ్యాపారులకు జీరో-ఎండీఆర్ నిబంధనలే వర్తిస్తాయి. దేశంలో జరిగే మొత్తం యూపీఐ లావాదేవీలలో దాదాపు 96 శాతం ఈ చార్జీల పరిధిలోకి రావని ప్రభుత్వం వెల్లడించింది. మొత్తంమీద ఈ నిరసన యూపీఐ వ్యవస్థకు వ్యతిరేకంగా కాకుండా, కేవలం అధిక విలువ కలిగిన మర్చంట్ లావాదేవీలపై ప్రతిపాదించిన ఎండీఆర్ చార్జీలను పునఃసమీక్షించాలనే ఉద్దేశంతోనే సాగింది.
