ఆంధ్రప్రదేశ్ రాష్ట్రంలో శాంతిభద్రతల పరిరక్షణ, పోలీస్ పరిపాలనను మరింత బలోపేతం చేసే దిశగా కూటమి ప్రభుత్వం సంచలన నిర్ణయం తీసుకుంది. ముఖ్యమంత్రి నారా చంద్రబాబు నాయుడు అధ్యక్షతన అమరావతి సచివాలయంలో జరిగిన రాష్ట్ర మంత్రివర్గ సమావేశంలో ఏకంగా నాలుగు కొత్త పోలీస్ కమిషనరేట్ల ఏర్పాటుకు కేబినెట్ అధికారిక ఆమోదం తెలిపింది. ఈ కీలక నిర్ణయం ప్రకారం రాజమహేంద్రవరం, గుంటూరు, తిరుపతి, కర్నూలు కేంద్రాలుగా సరికొత్త పోలీస్ కమిషనరేట్లు రూపుదిద్దుకోనున్నాయి. దీంతో ఆయా నగరాల్లో ప్రస్తుతం ఉన్న ఎస్పీల నాయకత్వంలోని పోలీస్ వ్యవస్థ స్థానంలో ఐపీఎస్ (డీఐజీ/ఐజీ స్థాయి) అధికారుల నేతృత్వంలో సమగ్ర కమిషనరేట్ వ్యవస్థ అందుబాటులోకి రానుంది.
రాష్ట్రంలోని ప్రధాన నగరాల్లో వేగంగా పెరుగుతున్న జనాభా, విస్తరిస్తున్న పట్టణ పరిధులు, పెరుగుతున్న ట్రాఫిక్ సమస్యలు, అత్యాధునిక సైబర్ నేరాల నియంత్రణను దృష్టిలో ఉంచుకుని ప్రభుత్వం ఈ నిర్ణయం తీసుకుంది. కమిషనరేట్ విధానం అమల్లోకి వస్తే మెజిస్టీరియల్ అధికారాలతో పాటు శాంతిభద్రతల పరిరక్షణ, ట్రాఫిక్ నిర్వహణ, నేర దర్యాప్తు విభాగాల్లో తక్షణ నిర్ణయాలు తీసుకునేందుకు అవకాశం కలుగుతుంది. డీఎస్పీల స్థానంలో ఏసీపీలు, ఎస్పీల స్థానంలో డీసీపీలు, సీపీలు బాధ్యతలు చేపట్టనుండటంతో పట్టణాల్లో నేర నియంత్రణ మరింత పకడ్బందీగా సాగనుంది. ఈ కమిషనరేట్ల పరిధుల ఖరారు, పోలీస్ స్టేషన్ల విభజన, అధికారుల కేటాయింపులపై త్వరలోనే పూర్తిస్థాయి ఉత్తర్వులు వెలువడనున్నాయి.
ఈ కేబినెట్ సమావేశంలో పోలీస్ వ్యవస్థ ఆధునీకరణతో పాటు రాజధాని అమరావతి నిర్మాణ పనులకూ ప్రభుత్వం భారీ నిధులను మంజూరు చేసింది. రాజధాని పరిధిలోని గ్రామాల్లో మౌలిక వసతుల కల్పన కోసం రూ. 1,548.98 కోట్ల పరిపాలనా అనుమతులతో పాటు, అదనపు ఇన్‌ఫ్రా పనులకు మరో రూ. 644.98 కోట్లను కేటాయించింది. అంతేకాకుండా దాచేపల్లి మైహోమ్ సిమెంట్ యూనిట్, శ్రీసిటీలో క్యాటర్‌పిల్లర్ గ్రీన్‌ఫీల్డ్ ఫెసిలిటీ సహా రాష్ట్రవ్యాప్తంగా వేల కోట్ల రూపాయల పారిశ్రామిక పెట్టుబడులు, భూ కేటాయింపులకు మంత్రివర్గం ఏకగ్రీవంగా ఆమోదముద్ర వేసింది.
