కర్ణాటక శాసనసభలో ముఖ్యమంత్రి డీకే శివకుమార్ చేసిన సంచలన వ్యాఖ్యలు రాష్ట్ర రాజకీయాల్లో పెను దుమారం రేపాయి. కరవు పరిస్థితి, బెంగళూరు నగరంలో పెరుగుతున్న జనాభా ఒత్తిడి మరియు వేగవంతమైన పట్టణీకరణపై అసెంబ్లీలో చర్చ జరుగుతుండగా సీఎం ఈ వ్యాఖ్యలు చేశారు. ఇతర ప్రాంతాల నుంచి బెంగళూరుకు వచ్చిన వారు తిరిగి తమ సొంత ప్రాంతాలకు వెళ్లడం లేదని చెబుతూ, ఇతర జిల్లాల నుంచి వచ్చిన శాసనసభ్యుల్లో దాదాపు డజను మంది ఇక్కడే రెండో పెళ్లిళ్లు చేసుకుని స్థిరపడిపోయారని, కావాలంటే వారి జాబితా కూడా ఇస్తానంటూ ఆయన చేసిన ప్రకటన తీవ్ర కలకలానికి దారితీసింది.
ఈ వ్యాఖ్యలపై ప్రధాన ప్రతిపక్షం బీజేపీ తీవ్రస్థాయిలో విరుచుకుపడింది. అసెంబ్లీ ప్రతిపక్ష నేత ఆర్. అశోక మాట్లాడుతూ.. ముఖ్యమంత్రి చేసిన వ్యాఖ్యలు పూర్తిగా అనవసరమైనవని, ఇతర ప్రాంతాల నుంచి రాజధానికి వచ్చి పనిచేస్తున్న ప్రతి ఎమ్మెల్యేపై అనుమానపు నీడలు కమ్మేలా ఉన్నాయని మండిపడ్డారు. ఇది శాసనసభ్యులందరి తలలపై వేలాడుతున్న కత్తిలా మారిందని ఆందోళన వ్యక్తం చేస్తూ, సీఎం తక్షణమే ఆ డజను మంది ఎమ్మెల్యేల పేర్లను అధికారికంగా సభ ముందు ఉంచాలని డిమాండ్ చేశారు.
మరో సీనియర్ బీజేపీ ఎమ్మెల్యే ఎస్. సురేశ్ కుమార్ సైతం ఈ వ్యవహారంపై ఘాటుగా స్పందించారు. శాసనసభ వంటి అత్యున్నత రాజ్యాంగ వేదికపై సరదాగా మాట్లాడినా కూడా ఇలాంటి వ్యాఖ్యలు సభా గౌరవాన్ని, ప్రజాప్రతినిధుల ప్రతిష్టను దిగజారుస్తాయని ఆగ్రహం వ్యక్తం చేశారు. సీఎం చేసిన ఈ ప్రకటన ప్రజల్లో అనవసరమైన అనుమానాలు, అపహాస్యానికి తావిచ్చిందని, ఆయన ఎవరిని ఉద్దేశించి మాట్లాడారో పేర్లను బహిరంగపరచి సభ ఔన్నత్యాన్ని కాపాడాలని స్పష్టం చేశారు.
