తెలంగాణ రాజకీయాల్లో సంచలనం సృష్టించిన ఫార్ములా-ఈ రేసు నిధుల దుర్వినియోగం కేసులో బీఆర్ఎస్ వర్కింగ్ ప్రెసిడెంట్, మాజీ మంత్రి కేటీ రామారావుకు నాంపల్లి ఏసీబీ ప్రత్యేక న్యాయస్థానంలో తీవ్ర ఎదురుదెబ్బ తగిలింది. ఈ కేసులో ప్రధాన నిందితులుగా ఉన్న కేటీఆర్‌తో పాటు మరో ముగ్గురి పాస్‌పోర్టులను తక్షణమే తాత్కాలికంగా జప్తు (ఇంపౌండ్) చేయాలంటూ అవినీతి నిరోధక శాఖ (ACB) కోర్టు హైదరాబాద్ రీజినల్ పాస్‌పోర్టు కార్యాలయానికి (RPO) అధికారికంగా ఆదేశాలు జారీ చేసింది.
గత బీఆర్ఎస్ ప్రభుత్వ హయాంలో హైదరాబాద్‌లో నిర్వహించిన ఫార్ములా-ఈ రేసు నిర్వహణ కోసం నిబంధనలకు విరుద్ధంగా హెచ్‌ఎండీఏ (HMDA) ఖాతాల నుంచి దాదాపు రూ.55 కోట్ల ప్రభుత్వ నిధులను ఫార్ములా-ఈ ఆపరేషన్స్ సంస్థకు మళ్లించారనే ఆరోపణలపై ఏసీబీ దర్యాప్తు చేపట్టింది. ఈ క్రమంలో అప్పటి పురపాలక శాఖ మంత్రి కేటీఆర్ (A1)తో పాటు పురపాలక శాఖ ప్రత్యేక ప్రధాన కార్యదర్శి అర్వింద్ కుమార్ (A2), హెచ్‌ఎండీఏ మాజీ చీఫ్ ఇంజినీర్ బీఎల్‌ఎన్ రెడ్డి (A3), స్పోర్ట్స్ కన్సల్టెంట్ కిరణ్ మల్లేశ్వరరావు (A4)లపై చార్జ్‌షీట్ దాఖలు చేసి విచారణ కొనసాగిస్తోంది.
ప్రస్తుతం కోర్టు విచారణ కీలక దశకు చేరుకున్న నేపథ్యంలో నిందితులు విదేశాలకు వెళ్లకుండా నిరోధించేందుకే వారి పాస్‌పోర్టులను సీజ్ చేయాలని ఏసీబీ అధికారులు న్యాయస్థానాన్ని ఆశ్రయించారు. ఈ అభ్యర్థనను పరిగణనలోకి తీసుకున్న కోర్టు.. విదేశీయుడైన ఐదో నిందితుడు అల్బెర్టో లోంగో మినహా మిగిలిన నలుగురు నిందితుల పాస్‌పోర్టుల తాత్కాలిక జప్తునకు ఆర్‌పీవోకు ఆదేశాలివ్వడంతో తదుపరి పరిణామాలు రాష్ట్రవ్యాప్తంగా తీవ్ర ఉత్కంఠను రేపుతున్నాయి.
