ముంబైలోని చారిత్రక దాదర్ శివాజీ పార్క్ మైదానంలో కాక్రోచ్ జనతా పార్టీ (CJP) చేపట్టిన భారీ నిరసన కార్యక్రమం తీవ్ర విషాదానికి దారితీసింది. కేంద్ర ఎన్నికల సంఘం (ECI) పనితీరును తప్పుబడుతూ, ప్రధాన ఎన్నికల కమిషనర్ (CEC) జ్ఞానేష్ కుమార్ రాజీనామా చేయాలని డిమాండ్ చేస్తూ శుక్రవారం సాయంత్రం నిర్వహించిన ఈ ఆందోళనకు సంఘీభావం తెలిపేందుకు వచ్చిన ఒక వృద్ధుడు హఠాత్తుగా గుండెపోటుకు గురై ప్రాణాలు కోల్పోయారు. అనుమతి లేనప్పటికీ వేలాది మంది తరలివచ్చిన ఈ నిరసన ప్రాంతంలో జరిగిన ఈ విషాద ఘటన తీవ్ర కలకలం రేపింది.
మృతిచెందిన వ్యక్తిని థానేలోని ‘దోస్తి వెస్ట్ కౌంటీ’కి చెందిన 75 ఏళ్ల గోపాలకృష్ణ సుబ్బయ్య పిళ్ళైగా పోలీసులు గుర్తించారు. కేరళకు చెందిన ఆయన ముంబైకి వచ్చి థానేలో నివసిస్తున్నారు. శుక్రవారం సాయంత్రం దాదాపు 30 కిలోమీటర్లు ప్రయాణించి శివాజీ పార్క్‌లో జరుగుతున్న నిరసన కార్యక్రమాన్ని ప్రత్యక్షంగా తిలకించేందుకు ఆయన చేరుకున్నారు. అక్కడ సభ జరుగుతున్న క్రమంలో సాయంత్రం సరిగ్గా 5 గంటల సమయంలో సుబ్బయ్య పిళ్ళైకి అకస్మాత్తుగా ఛాతీలో విపరీతమైన నొప్పి మొదలై అక్కడే కుప్పకూలిపోయారు.
పరిస్థితిని గమనించిన తోటి నిరసనకారులు, అక్కడే విధుల్లో ఉన్న పోలీసులు వెంటనే స్పందించి ప్రాథమికంగా సీపీఆర్ (CPR) చేసే ప్రయత్నం చేశారు. అనంతరం హుటాహుటిన సమీపంలోని ‘శుశ్రూష ఆసుపత్రి’కి తరలించారు. అత్యవసర వార్డులో వైద్యులు చికిత్స అందించినప్పటికీ ఫలితం లేకుండా పోయింది. ఆయన పరిస్థితి విషమించడంతో చికిత్స పొందుతూ తుదిశ్వాస విడిచినట్లు వైద్యులు అధికారికంగా ధ్రువీకరించారు. ప్రజా సమస్యలపై శాంతియుత నిరసనలో పాల్గొనేందుకు వచ్చి ఇలా ప్రాణాలు కోల్పోవడంతో కుటుంబ సభ్యులు, తోటి ఉద్యమకారుల్లో తీవ్ర విషాద ఛాయలు అలముకున్నాయి.
